Bogi Nils segir ekki sjálfbært að miðaverð haldist lágt til lengdar

Bogi Nils Bogason starfandi forstjóri Icelandair Group segir fargjöld Wow Air mjög lág og ráða má af orðum hans að þau muni hækka. Hann segir að margvísleg samlegðaráhrif fylgi kaupum Icelandair á Wow Air gangi þau eftir.

Bogi segir að viðræður hans og Skúla Mogensen forstjóra Wow Air, sem leiddu á endanum til þess að Icelandair keypti Wow Air, hafi borið brátt að. 

„Þær hófust með samtali á föstudagskvöldið. Síðan fór þetta í gang á laugardagsmorgun og kláraðist svo um hádegið í gær,“ segir Bogi. 

Munu neytendur sjá einhverjar breytingar hjá Wow Air ef kaupin ganga eftir?

„Ekki út af þessum kaupum en eins og við höfum séð þá hafa fargjöld verið mjög lág og margir velta fyrir sér hvort það sé sjálfbært til lengri tíma. Félögin verða eftir sem áður í mikilli samkeppni við fullt af stórum flugfélögum sem eru að fljúga hingað til lands og líka þau sem eru að fljúga yfir hafið. Þannig að þó að þessi viðskipti gangi í gegn þá verður samkeppnin mjög mikil áfram og það mun ekkert breytast út af þessum viðskiptum.“

Hann segir að margvísleg samlegðaráhrif fylgi kaupum Icelandair á Wow Air. „Að hafa stærri rekstur felur í sér samlegð. Að geta nýtt starfsfólk, tölvukerfi og fleira. Þegar félög stækka þá verður samlegð.“

Verður Skúli Mogensen áfram forstjóri Wow Air? „Þessi samruni er ekki genginn í gegn. Það eru mjög mörg skilyrði sem þarf að klára áður en að hann gengur í gegn. Það hefur ekkert verið rætt. En ég vona svo sannarlega að Skúli Mogensen verði áfram viðloðandi félagið ef við tökum við því.“

Fjárhagsstaða Wow Air mun skipta sköpum

Kaupin voru gerð með fyrirvara um áreiðanleikakönnun, samþykki hluthafafundar Icelandair Group og samþykki Samkeppniseftirlitsins. 

Um er að ræða svokallaðan láréttan samruna því Icelandair er að kaupa keppinaut á sama markaði. Reglan um fyrirtæki á fallandi fæti (e. failing firm defence) er viðurkennd í íslenskum samkeppnisrétti og hefur verið litið til túlkunar framkvæmdastjórnar Evrópusambandsins á reglunni við mat á samrunum á innri markaðnum. Í reglunni felst að samruni fyrirtækis á fallandi fæti er heimilaður þrátt fyrir að samruninn hafi í för með sér samkeppnishamlandi afleiðingar.

Heimir Örn Herbertsson sérfræðingur í samkeppnisrétti segir að niðurstaða Samkeppniseftirlitsins muni velta á því hvernig markaðir flugfélaganna tveggja eru skilgreindir. 

„Mér finnst mjög líklegt að staða Wow Air, hugsanleg rekstrarvandræði eða erfiðar framtíðarhorfur hjá því félagi, mér finnst mjög líklegt að það skipti verulegu máli varðandi það hvaða viðtökur þessi samruni fær (hjá Samkeppniseftirlitinu),“ segir Heimir Örn.