Haukur skoraði sex stig í sex stiga tapi

Haukur Helgi Pálsson skoraði 6 stig, tók 6 fráköst og gaf 2 stoðsendingar í sex stiga tapi Nanterre á Cholet eftir framlengingu.



Nanterre heimsótti Cholet en liðin eru á sitt hvorum enda deildarinnar, Nanterre í toppbaráttu á meðan Cholet er í bullandi fallbaráttu.



Nanterre byrjaði af krafti og leiddi eftir fyrsta leikhluta 26-19. Annar leikhluti var hins vegar skelfilegur hjá Nanterre en þeir töpuðu honum 25-9. Cholet leiddi því með níu stigum í hálfleik.



Nanterre voru ívið sterkari í seinni hálfleik en Cholet náði alltaf að halda forystunni. Það var ekki fyrr en í fjórða leikhluta sem Nanterre komst yfir, en forystan varði ekki lengi.



Svo fór að eftir fjóra leikhluta, var staðan 77-77 og þurfti því að framlengja.



Cholet byrjaði framlenginguna af krafti og komst snemma níu stigum yfir. Forystuna héldu þeir út framlenginguna og unnu þeir að lokum sex stiga sigur, 98-92.