Einni skipað í heiðursflokk

Eftirmyndir af Höfða og Alþingishúsinu eru á meðal sköpunarverka mikillar áhugakonu um piparkökuhúsabakstur. Hún vann jólakeppni Kötlu svo oft að henni var einni skipað í heiðursflokk.

Valdís Einarsdóttir er búsett á Akranesi og í sjónvarpsherberginu á heimili hennar standa nokkur vel valin piparkökuhús sem hún hefur bakað og byggt í gegnum árin. Það elsta er orðið átján ára gamalt og ber aldurinn vel. Valdís segir áhugann hafa kviknað fyrir um þrjátíu árum þegar hún fór að baka og skreyta öllu smærri hús með barnabörnum.

Hún er sjálfmenntuð í piparkökuhúsagerð en áhuginn ágerðist þegar hún skráði sig í árlega piparkökuhúsakeppni Kötlu.

„Þegar ég fór með fyrsta húsið sneri ég nú við á leiðinni af því mér fannst það ekki vera nógu vandað. En síðan árið eftir fór ég aftur og þá fékk ég þriðju verðlaun. Svo fór ég að fá fyrstu verðlaun alltaf eftir það," segir Valdís.

Svo oft sigraði hún keppnina að aðrir voru ekki taldir eiga séns.

„Það var náttúrulega orðið svolítið þreytandi, það hafa allir hugsað; Ohh kemur hún þarna einu sinni enn. Svo þær töluðu við mig og mér fannst líka allt í lagi. Ég var búin að vinna svo mikið.," segir hún.

Voru fleiri í þessum flokki? 

„Nei ég var bara ein. Mér finnst þetta alveg rosalega gaman. Þetta er bara jólaföndrið mitt."

Nokkur af verðlaunahúsunum eru nokkuð nákvæmar eftirmyndir þekktra húsa, líkt og Höfða, Fríkirkjuvegs 11 og Alþingishússins. 

„Þá fór ég og tók myndir og síðan bara teiknaði ég eftir þeim," segir Valdís. Við gerð annarra lét hún ímyndunaraflið ráða för og nefndi verkin í höfuðið á barnabörnum sínum sem hafa að mestu staðist þá freistingu að fikta í húsunum. 

„En svo sá ég að það var einhver búinn að fá sér smá smakk. Og svo voru alls staðar grýlukerti hér, en það er búið að taka þau," segir Valdís og bendir á nokkur hús. 

Valdís hefur lagt keppnisskapið til hliðar og bakar nú einfaldari hús með afkomendum.  „Ég fékk að mæla hliðarnar og svona og skreyta og setja nammi," segir Valdís Kristinsdóttir, barnabarn Valdísar og bendir á hús sem þær nöfnur gerðu saman. „Mér finnst þetta mjög fallegt það sem amma gerir."