PSG vill fá samherja Gylfa

Franska meistaraliðið PSG hefur mikinn áhuga á því að kaupa miðjumanninn Idrissa Gueye frá Everton.

PSG er búið að bjóða Everton 21,5 milljónir punda fyrir leikmanninn en fastlega er búist við því að Everton hafni því tilboði. Félagið segir að hann sé ekki til sölu.

Leikmaðurinn er þó eðlilega sagður vera mjög áhugasamur að ganga í raðir franska félagsins.

Það eru enn nokkrir dagar eftir af félagaskiptaglugganum og PSG gæti mögulega hækkað tilboðið og athugað hversu mikið Everton vill halda leikmanninum.

Gueye kom til Everton fyrir tveimur og hálfu ári frá Aston Villa. Þá kostaði hann aðeins 7,6 milljónir punda. Hann hefur verið fastamaður í liði Everton síðan hann kom þangað.

Miðjumaðurinn hefur spilað 20 leiki í deildinni í vetur eftir að hafa spilað með Senegal á HM síðasta sumar.