Patrekur hættur með Austurríki

Handknattleikssamband Austurríkis tilkynnti frekar óvænt í dag að Patrekur Jóhannesson væri hættur sem landsliðsþjálfari þjóðarinnar.

Þessi ákvörðun er sögð hafa verið tekin eftir ítarlegar viðræður Patreks við sambandið. Patrekur átti að stýra liðinu á EM 2020 í heimalandinu en nú er ljóst að annar þjálfari mun gera það.

Patrekur hefur stýrt liði Austurríkis í 106 leikjum og unnið 45 þeirra. Sex leikir hafa endað með jafntefli og 55 hefur liðið tapað. Patrekur fór með liðið á fjögur stórmót og er farsælasti landsliðsþjálfarinn í handboltasögu Austurríkis.

Hann tók við liðinu í nóvember árið 2011 en frammistaða liðsins á HM í janúar olli vonbrigðum.

Patrekur er að þjálfa Olís-deildarlið Selfoss í dag en mun flytja búferlum næsta sumar þar sem hann er að taka við danska liðinu Skjern. Það félag mun njóta allra krafta Patreks fyrst hann er hættur sem landsliðsþjálfari.