Hannes tekur ekki við Selfyssingum: Leit hafin að nýjum þjálfara

Hannes Jón Jónsson mun ekki taka við Selfyssingum í Olís-deild karla fyrir næsta tímabil eins og samið hafði verið um en hann hefur samið við Bietigheim í þýsku úrvalsdeildinni.

Selfoss greindi frá þessu í tilkynningu sem þeir sendu fjölmiðlum nú undir kvöld en þar segir að „aðilar hafa náð samkomulagi um starfslok Hannesar og skilja í sátt.“

„Ég þakka handknattleiksdeild Umf. Selfoss kærlega fyrir skilninginn og að gera mér kleift að takast á við annað verkefni erlendis,“ sagði Hannes enn fremur í tilkynningunni.

Selfyssingar hafa nú þegar hafið leitina að nýjum þjálfara og vonast til að geta ráðið nýjan þjálfara sem fyrst en Patrekur Jóhannesson yfirgefur Selfyssinga í sumar og tekur við Skjern.