Yfir 270 starfsmenn allsherjarkosninga í Indónesíu eru látnir. Flest dauðsföllin má rekja til þreytu sökum langrar vinnu við að handtelja atkvæði kjósenda í forseta- og tvennum þingkosningum landsins.
Arief Priyo Susanto, talsmaður yfirkjörstjórnar kosninganna, segir 1878 starfsmenn til viðbótar hafa lagst í veikindi. Vinna við að telja atkvæðin hófst þegar Indónesíubúar gengu að kjörborðinu 17. apríl síðastliðinn.
Kjörsókn var um 80% sem þýðir að telja þurfti 155 milljónir atkvæða í hverjum kosningum fyrir sig. Alls var kosið á 800 þúsund kjörstöðum.
Þetta gríðarstóra verkefni virðist sannarlega hafa tekið sinn toll á starfsmenn kjörstjórnar en 272 þeirra hafa verið staðfestir látnir sökum yfirvinnutengdra veikinda.
Yfirkjörstjórn Indónesíu hyggst bæta fjölskyldum þeirra sem látist hafa ástvinamissinn með því að greiða um 36 milljónir rúpía á hvern látinn starfsmann. Það eru rúmar 300 þúsund íslenskar krónur og jafngildir árslaunum lágmarkslaunastarfsmanns í Indónesíu.
Þetta var í fyrsta sinn sem kosið var til forseta, landsþings og staðbundinna þinga á sama tíma í Indónesíu og telja margir það vera ástæðu fyrir því gríðarlega álagi sem starfsfólk kjörstjórnar stóð frammi fyrir.
Joko Widodo, forseti Indónesíu, og Prabowo Subianto, forsetaframbjóðandi, hafa lýst yfir sigri í kosningunum til forseta. Útgönguspár benda þó til þess að Widodo hafi haft betur með allt að tíu prósentustiga mun.
Gert er ráð fyrir að talningu atkvæða ljúki 22. maí næstkomandi.
Á þriðja hundrað látin við talningu atkvæða
