Samtök gegn gyðingahatri krefja framkvæmdastjóra Eurovision um brottrekstur Hatara

Samtök breskra lögfræðinga til stuðnings Ísraelsríkis og bandarísk samtök sem berjast gegn gyðingahatri hafa skrifað Jon Ola Sand, framkvæmdastjóra Eurovision, bréf þar sem hann er hvattur til að reka hljómsveitina Hatara, íslensku keppendurna í ár, úr keppni. Söngvari Hatara segir viðbrögð samtakanna sýna hversu miklir hagsmunir séu í húfi fyrir þau.

Hatari hafi brotið gegn „anda og reglum Eurovision“

Samtökin, UK Lawyers for Israel (UKLFI) og hin bandarísku Simon Wiesenthal-samtök, skrifa undir bréfið en yfirlýsing vegna bréfsins var birt á vefsíðu þeirra síðarnefndu í fyrradag. Þar er greint frá því að bréfið hafi verið sent til Sand til að „koma í veg fyrir að keppnin dagana 14-18. maí í Tel Aviv verði gerð pólitísk“.

Sjá einnig: Telja Hatara nytsama sakleysingja í áróðursmaskínu Ísraelríkis

Þá segir að UKLFI hafi hvatt til brottreksturs Hatara þar sem hljómsveitin hafi brotið gegn bæði „anda og reglum Eurovision“. Hatari hafi nánar tiltekið brotið reglu keppninnar númer 2.6, þar sem komi skýrt fram að Eurovision skuli vera ópólitísk keppni.

Í bréfinu segir einnig að Hatari hafi gert það ljóst að sveitin sé andstæðingur ísraelskra stjórnvölda. Texti lagsins „Hatrið mun sigra“ feli jafnframt í sér mótmæli gegn kapítalisma og þar með taki hljómsveitin pólitíska afstöðu. Auk þess sé textinn and-evrópskur, and-menningarlegur og hatursfullur.

Auk Sand hafi Samband evrópskra sjónvarpsstöðva, Jean-Paul Philippot forseti sambandsins og framkvæmdastjórinn Noel Curran fengið bréfið þar sem brottreksturs Hatara er krafist.

Bendir á „árásir“ á söngvakeppnina

Þá bendir Shimon Samuels, yfirmaður alþjóðatengsla hjá Simon Wiesenthal-samtökunum, á „röð árása“ á söngvakeppnina síðan Ísrael sigraði keppnina í Lissabon í fyrra. Þar er m.a. vísað í kröfu nokkurra evrópskra listamanna um sniðgöngu keppninnar í ár og ummæli tónlistarmannsins Roger Waters, sem kallaði eftir því að Samband evrópskra sjónvarpsstöðva héldi keppnina í öðru landi en Ísrael, auk áðurnefndrar þátttöku Hatara.

Simon Wiesenthal-samtökin voru stofnuð árið 1977 og er markmið þeirra að berjast gegn gyðingahatri, að því er segir á heimasíðu samtakanna. Samtökin eru yfirlýst hliðholl Ísraelsríki og starfa náið með fyrirtækjum og ríkisstofnunum í Bandaríkjunum til að bera út boðskap sinn.

Samtökin hafa ítrekað gagnrýnt hina palestínsku BDS-hreyfingu, sem berst fyrir sniðgöngu á ísraelskum vörum í ljósi framgöngu þeirra gegn Palestínumönnum. Þá börðust samtökin gegn byggingu Park51, félagsmiðstöðvar fyrir múslima, í grennd við Ground Zero í New York, þar sem árásin á Tvíburaturnana var gerð árið 2001.

 

Augljóst markmið taki bitið úr gagnrýninni

Matthías Tryggvi Haraldsson, annar söngvari Hatara, segir í samtali við Vísi að gagnrýni samtakanna verki bitlaus. Málið sé greinilega spurning um hagsmuni.

„Auðvitað er alltaf gaman að sjá þegar fólk les af svona mikilli alúð í textana manns en þegar markmiðið með rýninni er svona augljóst þá tekur það kannski bitið úr henni. Hitt er annað mál að svona viðbrögð sýna hversu miklir hagsmunir eru í húfi,“ segir Matthías.

Starfshópur þvert á ráðuneyti

Hataramenn hafa vakið mikla athygli í Ísrael og víðar vegna þátttöku sinnar í keppninni. Þeir hafa gagnrýnt Ísrael opinberlega, m.a. í viðtali við Stundina í febrúar, en þar sögðust þeir vilja nýta dagskrárvaldið í Eurovision til að gagnrýna stefnu ísraelskra stjórnvalda í utanríkismálum, einkum vegna framgöngu þeirra gegn Palestínumönnum.

Hatarar hafa á móti verið gagnrýndir í Ísrael. Þannig kölluðu Shurat HaDin, umdeild samtök sem segjast berjast fyrir réttindum fórnarlamba hryðjuverkaárása í Ísrael, eftir því að innanríkisráðherra Ísraels komi í veg fyrir að hljómsveitin fái að koma fram í Eurovision.

Í mars kom svo ísraelska innanríkisráðuneytið á fót starfshóp, þvert á ráðuneyti, sem ætlað var að skoða hvernig taka ætti fyrir mögulegt andóf gegn Ísrael í Eurovision, sérstaklega í ljósi þátttöku Hatara í keppninni.