Færri sækja um vegabréf

Alls voru 2.212 vegabréf gefin út í apríl en það eru 37,1 prósenti færri vegabréf en í sama mánuði í fyrra. Þá voru þau 3.515 talsins.

Helgi Harðarson, hjá Sýslumanninum á höfuðborgarsvæðinu, segir eðlilega skýringu á fækkuninni. „Endingartími vegabréfa breyttist úr fimm árum í tíu ár svo nú er svona tímabil þar sem lítið af vegabréfum er að renna út.“

Mikið hefur verið fjallað um langar raðir í vegabréfadeild Sýslumannsins á höfuðborgarsvæðinu síðastliðin ár en samkvæmt Helga er nú mun rólegra yfir. „Fólk reiknar með því að þurfa að bíða hérna heillengi en svo er kannski bara engin röð“ segir Helgi.