Kölluð út vegna sterkrar og vondrar lyktar af völdum gervi­nagla

Lögregla á Suðurnesjum var nýverið kölluð út í fjölbýlishús eftir að íbúar þar höfðu samband og kvörtuðu undan mjög sterkri og óþolandi vondri lykt í stigaganginum.

Í tilkynningu frá lögreglu segir að þegar lögreglumenn mættu á staðinn reyndust íbúarnir síst hafa ýkt ástandið og hafi fýlan komið frá tiltekinni íbúð.

„Íbúi hennar kom til dyra og kvaðst vera að setja gervineglur á stúlku þar inni og af því stafaði lyktin.  Viðkomandi var vinsamlegast bent á að svona gæti þetta ekki gengið því nær ólíft væri í stigaganginum og íbúarnir kvörtuðu sáran. Konunni, sem um var að ræða, var jafnframt tilkynnt að Heilbrigðiseftirliti Suðurnesja yrði gert viðvart og var það síðan gert,“ segir í tilkynningunni.