Eldur kom upp í strætis­vagni

Eldur kom upp í strætisvagni á athafnasvæði Strætó við Hestháls í Reykjavík í morgun.

Að sögn slökkviliðs kom útkallið klukkan 9:55, en þegar slökkvilið kom á svæðið voru starfsmenn Strætó að mestu búnir að slökkva eldinn. Slökkviliðsmenn sáu hins vegar um að slökkva í glæðum.

Talsverður reykur barst frá vagninum og bárust slökkviliði nokkrar ábendingar vegna málsins. Ljóst er að talsvert tjón varð á vagninum.

Guðmundur H. Helgason, upplýsingafulltrúi Strætó, segir að vagninn hafi ekki verið í gangi þegar eldurinn kom upp. Rannsókn á upptökum eldsins fer líklegast fram á morgun.