Sambýlingarnir áttu báðir fíkniefni

Lögreglan á Suðurnesjum fann fíkniefni við húsleit á heimili ökumanns sem stöðvaður hafði verið við akstur á sunnudagskvöld. Ökumaðurinn játaði neyslu amfetamíns og játaði að eiga fíkniefnin sem fundust í híbýlum hans. Þá framvísaði félagi hans, sem býr með honum, einnig fíkniefnum, að því er fram kemur í tilkynningu frá lögreglu.

Annar ökumaður sem var tekinn úr umferð vegna gruns um fíkniefnaakstur var jafnframt kærður fyrir hraðakstur og ók sviptur ökuréttindum.

Fáeinir ökumenn til viðbótar voru grunaðir um vímuefnaakstur og skráningarnúmer voru fjarlægð af nokkrum ótryggðum eða óskoðuðum bifreiðum.