Segir erfið verkefni bíða sín sem forstjóri Samherja

Björgólfur Jóhannsson, nýsettur forstjóri Samherja, dregur engan dul á það að hans bíði tiltölulega erfitt verkefni fram undan.

Stjórn Samherja óskaði eftir því að Björgólfur tæki starfið að sér á meðan Þorsteinn Már Baldvinsson stígi til hliðar sem forstjóri. Ætlar Þorsteinn að víkja þar til helstu niðurstöður innri rannsóknar á starfsemi dótturfélags í Namibíu liggja fyrir.

Sjá einnig: Samherjamálið skref fyrir skref

Björgólfur þekkir fyrirtækið vel og gegndi áður stöðu framkvæmdastjóra nýsköpunar- og þróunarsviðs Samherja. Rætt var við hann í Reykjavík Síðdegis á Bylgjunni í dag.

„Þannig að ég þekki fyrirtækið og þykir vænt um það, og það var ósköp eðlilegt fyrir mig að segja já við þessari beiðni.“

Mikilvægt að starfsfólk standi með stjórnendum

Er það erfitt verkefni sem bíður þín?

„Já, örugglega tiltölulega erfitt en þetta er bara verkefni eins og hvert annað sem þarf að takast á við og maður einhentir sér í.“

Björgólfur segir það mikilvægt að starfsfólk fyrirtækisins standi með stjórnendum og stjórn fyrirtækisins.

„Starfsfólk þessa félags þekkir auðvitað svona anga af slíku máli, eða málum áður. Vísa ég þar til Seðlabankamálsins.“

„Það er auðvitað mikilvægt að hafa það í huga að þetta er eitt af stærri fyrirtækjum landsins og mjög mikilvægt að það sé að starfa í sátt við umhverfi sitt og sé að starfa samkvæmt lögum og reglum.“

Samherji muni vinna með opinberum aðilum

Aðspurður út í ummæli þingmanna um að frysta ætti eigur félagsins á meðan rannsókn á málinu standi yfir segir hann mikilvægt að viðskiptavinir félagsins um heim allan haldi áfram að fá sínar vörur afhentar.

„Mér finnst að fólk þurfi að vara sig í þessari orrahríð og þessari umræðu eins og hún er. Málið er í vinnslu, Samherji mun að sjálfsögðu vinna með opinberum aðilum að því að finna niðurstöðu í þessu máli.“

Sjá einnig: Björgólfur Jóhannsson í leyfi hjá Íslandsstofu

„Það er bara mikilvægt að hið sanna komi fram, en að félagið þarf auðvitað að geta starfað áfram. Þetta er mikilvægt félag fyrir samfélagið og þá sérstaklega hér á Eyjafjarðarsvæðinu.“

Hafa fengið fyrirspurnir frá viðskiptavinum vegna málsins

Aðspurður segir Björgólfur að fyrirtæki og viðskiptavinir víða um heim hafi vissulega sent félaginu fyrirspurnir í kjölfar fjölmiðlaumfjöllunarinnar en fullyrðir að enginn hafi hætt viðskiptum við félagið í kjölfar hennar.

„Það eru einfaldlega fyrirspurnir um það hvort að þeir þurfi að hafa einhverjar áhyggjur af því að fá vörur í samræmi við þá samninga sem gerðir hafa verið.“

Björgólfur segir að rannsóknin eigi ekki að hafa teljandi áhrif á starfsemi fyrirtækisins.

„Félagið þarf að halda áfram að geta starfað eðlilega, ef að einhverjar brotalamir hafi átt sér stað þá er mjög mikilvægt að það komi upp á yfirborðið.“

Að hans sögn liggur ekki fyrir hve lengi hann mun sitja forstjórastólinn.

„Það fer nú bara mjög mikið eftir því hvernig þessari rannsókn miðar. Það stendur í tilkynningunni að þetta sé tímabundið og það er tímabundið og það verður þá fram að því að niðurstaðan kemur.“

Hlusta má á viðtalið við Björgólf í heild sinni í spilaranum hér fyrir neðan.