KKÍ segir enga vísbendingu um veðmálasvindl í leik ÍR og Tindastóls

Körfuknattleikssamband Íslands fann enga vísbendingu um veðmálasvindl í leik ÍR og Tindastóls í Domino's deild karla á fimmtudaginn. Þetta kemur fram í yfirlýsingu frá KKÍ.

Grunur var um að maðkur hefði verið í mysunni og úrslitum leiksins hagrætt. Stuðlar breyttust mjög hratt á skömmum tíma fyrir leikinn og þótti líklegra að Tindastóll myndi tapa leiknum en ekki vinna hans eins og áður.

KKÍ naut liðssinnis Íslenskra getrauna og GLMS, Global Lottery Monitory System, við rannsókn málsins. Ekki var tippað óeðlilega á leikinn hjá Íslenskum getraunum og GLMS taldi að ekki væri um hagræðingu úrslita að ræða.

KKÍ fékk einnig einstaklinga til að fara yfir frammistöðu leikmanna í leiknum, bæði í vörn og sókn, til að kanna hvort eitthvað óeðlilegt hefði átt sér stað. Niðurstaðan var að svo væri ekki.

Í yfirlýsingunni kemur fram að nokkrir tipparar hafi talið að erfitt ferðalag Tindastóls til Reykjavíkur myndi sitja í þeim og því veðjað frekar á ÍR. Viðkomandi tipparar hafi því tippað á forgjöfina á erlendum vefsíðum. Jafnframt kemur fram að ekki þurfi umtalsverðar fjárhæðir til að stuðlarnir breytist á þennan hátt.

Fljótlega eftir að leik ÍR og Tindastóls í Domino´s deild karla lauk, kom upp orðrómur um að úrslitum leiksins hefði verið hagrætt og gefið sterklega í skyn að leikmenn Tindastóls hafi átt þar hlut að máli. Það er ljóst eftir skoðun KKÍ á leiknum að leikmenn Tindastóls hafi ekki komið að hagræðingu úrslita á leiknum og eiga engan hluta að þessum breytingum á forgjöf/stuðlum.

Ástæðan fyrir þessum sterka orðrómi var sú að forgjöf/stuðlar á leikinn hefðu breyst mjög hratt á skömmum tíma úr því að Tindastóll myndi vinna leikinn yfir í að Tindastóll myndi tapa leiknum. Í kjölfarið á þessum orðrómi ákvað KKÍ strax að grípa til aðgerða, enda er hagræðing úrslita ein mesta ógn sem íþróttahreyfingin stendur fyrir nú á tímum.

KKÍ hefur fengið einstaklinga til að skoða leikinn og fara yfir frammistöðu leikmanna bæði í vörn og sókn með það í huga að sjá hvort eitthvað óeðlilegt hafi átt sér stað. 

Niðurstaðan er sú að svo sé ekki.

KKÍ óskaði eftir aðstoð frá Íslenskum getraunum, sem eru í eigu íþróttahreyfingarinnar, um að fyrirtækið léti skoða leikinn sérstaklega.

Niðurstaðan er sú að ekki var tippað óeðlilega á leikinn hjá Íslenskum getraunum. 

Enn fremur var leitað til GLMS, Global Lottery Monitory System, sem er fyrirtæki í eigu getraunafyrirtækja sem hefur það að markmiði að fylgjast með óeðlilegum hreyfingum og stuðlabreytingum á markaði. Meðal samstarfsaðila GLMS eru Europol, Interpol ofl.

Niðurstaða GLMS er að ekki séu líkur á að um hagræðingu úrslita sé að ræða.

Allar líkur eru á að þegar það verður á allra vitorði að Tindastóll hafði ferðast í rútu í nokkra klukkutíma til að komast í leikinn og að leiktíma hafi verið breytt úr 19:15 í 20:00 örfáum klukkutímum fyrir leik að þá hafi nokkrir tipparar talið að ferðalagið myndi sitja í liðsmönnum Tindastóls og að sigurlíkur ÍR hefðu þar að leiðandi aukist. Viðkomandi tipparar hafi því tippað á forgjöfina á erlendum vefsíðum. Ekki þarf umtalsverðar fjárhæðir til að stuðlarnir breytist á þann hátt sem reyndin varð.

KKÍ leggur mikla áherslu á að vinna gegn hagræðingu úrslita í íþróttum með öllum mögulegum ráðum. Hluti af þeirri ógn sem stafar frá hagræðingu úrslita í íþróttum á Íslandi kemur til vegna þess að óheftur aðgangur er fyrir hvern sem er að erlendum veðmálasíðum, án nokkurs eftirlits frá íslenskum stjórnvöldum. Er það mikið áhyggjuefni fyrir íþróttahreyfinguna á Íslandi.

KKÍ þakkar öllum þeim aðilum sem aðstoðu sambandið á undanförnum dögum fyrir hraða og góða vinnu.