Óskar þess að einhverjum 21 árs gæja finnist hún heit

Fyndnustu mínar eru uppistandshópur þeirra Lóu Bjarkar, Sölku Gullbrár og Rebeccu Scott Lord. Þremenningarnir hafa tileinkað sér að fjalla um kvenleikann og hans fylgifiska á gagnsæjan og hreinskilinn máta í uppistöndum sínum. Uppistandssýning þeirra verður í Tjarnarbíó 13. desember.

Konurnar hafa allar sviðslistabakgrunn á einn hátt eða annan en hafa þó hver um sig sitt hlægilegt sjónarhorn á lífið og tilveruna.

Í sýningunni Heilögustu mínar: Jólakraftaverk í Tjarnarbíó fara þær út fyrir uppistandsformið með trópikalskri sviðsmynd, tónlistaratriðum og óvæntum uppákomum í einstakri jóla-kabarett-uppistandssýningu.

Í tilkynningu frá hópnum er nokkuð ítarleg lýsing á þeim sem koma fram:

Rebecca Scott Lord er bandarísk sviðslistakona sem er staðsett hér á landi og starfar fyrir Þjóðleikhúsið. Hún segir til dæmis frá aðlögun sinni til nýs samfélags á skondinn máta með sögu um útréttingar í Húsasmiðjunni.

Lóa Björk er íslensk kona sem starfar fyrir Útvarp 101 og hefur sagt frá þeim kalda raunveruleika næturlífs og daglífs sem má finna í íslensku samfélagi. Hún fer í brasilískt vax til að „upplifa eitthvað“ og fjallar um drauma sína og þrár, sem fjalla flestir um athygli frá karlmönnum.

Salka Gullbrá hefur staðið á bak við verkefni eins og Krakkaveldi, stjórnmálaafl krakka, og er söngkona í pönkhljómsveitinni Stormy Daniels. Í uppistandi sínu reynir hún meðal annars að varpa kómísku ljósi á val sitt að vera gagnkynhneigð á Íslandi árið 2019 og rannsakar jógaiðkendur sem virðast vera á kókaíni - og já, hún er komin 7 mánuði á leið svo það mætti segja að tímabundið sé hún hin íslenska Ali Wong.

Sérstakir gestir jólasýningarinnar Heilögustu mínar eru:

Hekla Elísabet er ein handritshöfunda Jarðarförin mín, ljúfsárra gamanþátta með Ladda í aðalhlutverki. Hekla vinnur einnig fyrir UN Women og er menntaður sviðshöfundur. Hún vakti mikla lukku á síðasta uppistandi með Fyndnustu mínum og fengu þær hana því aftur til að koma og láta ljós sitt skína á jólasýningunni.

Ásdís María er íslensk söngkona og lagahöfundur búsett í Berlín. Ásdís heillaði landsmenn uppúr skónum þegar hún tók þátt í Söngvakeppni Sjónvarpsins en þessa dagana semur hún tónlist í Berlín og kemur fram með hljómsveitinni sinni Banglist. Hún er þekkt fyrir sína sjarmerandi sviðsframkomu og einstakan húmor.

Hér að neðan má sjá skemmtilega stiklu frá hópnum: