Valdi Mane fram yfir Salah

Liverpool-goðsögnin og nú álitsgjafi Sky Sports, Jamie Carragher, segir að hann myndi velja Sadio Mane fram yfir Mohamed Salah en þetta sagði hann í spjalli við fylgjendur sína á Instagram í gærkvöldi.

Mane og Salah hafa verið hluti af framlínu Liverpool undanfarin ár ásamt Roberto Firmino en þeir hafa spilað lykilhlutverk í liði Liverpool sem varð Evrópumeistari á síðustu leiktíð og er á góðri leið með að vinna sinn fyrsta Englandsmeistaratitil í 30 ár.

Carragher fékk spurninguna Salah eða Mane og hann svaraði: „Ég er Mane maður. Ég er mikill aðdáandi hans. Hann er minn uppáhalds Liverpool leikmaður. Mér finnst Virgil vera bestur en Mane er minn uppáhalds,“ sagði Carragher.

Fyrrum varnarmaður félagsins var einnig spurður út í þær sögusagnir um að Timo Werner gæti verið á leið til félagsins en eins og Vísir greindi frá fyrr í dag þá vill Jurgen Klopp fá einkafund með Werner til að ræða við hann um framtíðina.

„Þetta leit út fyrir að vera svo gott sem neglt fyrir kórónuveiruna sem getur haft svo mikil áhrif á félagaskipti sumarsins. Þetta gæti frestað skiptunum þangað til næsta sumar,“ sagði Carragher.