Einn í alvarlegu ástandi eftir bruna á Akureyri

Allt tiltækt slökkvilið Akureyrar var kallað út á áttunda tímanum í kvöld þegar eldur kom upp í þriggja hæða íbúðarhúsi. Einum var bjargað út úr húsinu og fluttur á sjúkrahús en sá er í alvarlegu ástandi, samkvæmt upplýsingum frá slökkviliðinu, og mun húsið vera tómt. Ekki tókst þó að klára leit þar.

Fólk er beðið um að halda sig frá vettvangi.

Húsið er bárujárnsklætt og er erfitt fyrir slökkviliðsmenn að komast að eldinum. Verið er að rífa þakið af húsinu til að auðvelda slökkvistarfið en varðstjóri segir húsið alelda.

Ólafur Stefánsson, slökkviliðsstjóri, segir að útkallið hafi borist á áttunda tímanum. Samkvæmt tilkynningu barst mikill reykur út um glugga og voru reykkafarar sendir inn. Þeir gátu ekki leitað í öllu húsinu vegna hita og reyks og þurftu að hörfa.

Einum var bjargað og var hann fluttur á bráðamóttöku í alvarlegu ástandi.

Ólafur býst við því að húsið verði að mestu rifið niður á meðan á slökkvistarfi stendur. Mjög erfitt sé að eiga við eldinn og mikið sé af eldfimum efnum í veggjum hússins. Það logi vel í allsstaðar og bárujárnið haldi eldinum inn í veggjunum.

Lögreglan á Akureyri segir að reykkafarar hafi fundið rænulausan mann á miðhæð hússins. Aðrir hafi ekki verið þar inni.

Þá segir í færslu á Facebooksíðu lögreglunnar að húsið sé tveggja hæða timburhús á steyptum kjallara. Það standi meðal annarra timburhússa í gamalgrónu hverfi við Hafnarstræti á Akureyri.

Tvö önnur hús voru rýmd og hafa íbúar verið hvattir til að loka gluggum sínum.