Tilkynnti eigið innbrot

Rétt fyrir klukkan fjögur í nótt tilkynnti maður um eigið innbrot í veitingahús í miðbænum. Hann hafði brotið rúðu og farið inn. Hann kom síðan aftur út með áfengisflösku og drakk úr flöskunni þar til lögregla kom á vettvang. Hann var handtekinn og vistaður vegna rannsóknar málsins í fangageymslu lögreglu. Mikið var um að vera í nótt og sinnti lögreglan mörgum verkefnum. Þar á meðal var mikið um tilkynningar til lögreglu vegna samkvæmishávaða á höfuðborgarsvæðinu.

Tilkynnt var um þjófnað á fjórða tímanum í gær í verslun í miðbænum. Maður í annarlegu ástandi var handtekinn grunaður um þjófnaðinn, misnotkun skráningarmerkja og brot á lyfjalögum. Maðurinn var kominn inn í bíl sinn fyrir utan verslunina þegar lögreglan kom á vettvang. Bíllin var ekki með rétt skráninganúmer og voru þau fjarlægð af lögreglu og bíllinn fluttur á burt. Maðurinn var vistaður fyrir rannsókn málsins í fangageymslu lögreglu.

Annar maður var handtekinn grunaður um þjófnað og vörslu fíkniefna. Hann var með ferðatösku og bakpoka sem hann gat ekki gert grein fyrir. Hann var vistaður í fangageymslu lögreglu vegna rannsóknar málsins. Þá var maður handtekinn í miðbænum í annarlegu ástandi. Hann vildi ekki greiða fyrir akstur leigubíls sem hann hafði notað og réðst hann að lögreglumönnum sem komu á vettvang. Hann var handtekinn og vistaður í fangageymslu vegna ástands.

Kona í annarlegu ástandi var handtekin á Grandagarði í gærkvöldi en ítrekað var búið að tilkynna konuna þar sem hún gekk á miðri akbraut, hafði ekki greitt fyrir veitingar og fleira. Hún var vistuð í fangageymslu lögreglu. Þá var bíll stöðvaður í miðbænum eftir að bílnum hafði tvívegis verið ekið yfir gatnamót á rauðu ljósi. Ökumaðurinn var grunaður um akstur undir áhrifum fíkniefna, vörslu og sölu fíkniefna og fleira. Maðurinn var vistaður í fangageymslu lögreglu. Þá var farþegi í bíl hans einnig handtekinn grunaður um vörslu og sölu á fíkniefnum, brot á vopna- og lyfjalögum og fleira. Hann var einnig vistaður í fangageymslu.

Tilkynnt var um umferðaróhapp rétt fyrir klukkan eitt í nótt á Hverfisgötu í miðbænum. Maður á rafmagnshlaupahjóli datt á andlitið og braut í sér tennur og var í kjölfarið fluttur á bráðadeild til aðhlynningar.

Þá var maður handtekinn í Breiðholti, grunaður um húsbrot og líkamsárás. Hann var vistaður í fangageymslu lögreglu. Tveir voru stöðvaðir vegna gruns um akstur undir áhrifum fíkniefna eða áfengis. Annar þeirra var einnig grunaður um ítrekaðan akstur sviptur ökuréttindum.

Þá var tilkynnt um innbrot á ellefta tímanum í nótt. Maður var handtekinn grunaður um innbrotið og vistaður í fangageymslu lögreglu.