Mikil hlýindi í kortunum og hita­met gætu fallið

Gul veðurviðvörun er nú í gildi um land allt vegna leysinga en snemma í fyrramálið tekur síðan gul viðvörun gildi á Breiðafirði, Ströndum, Norðurlandi vestra og Norðurlandi eystra vegna sunnanstorms.

Samkvæmt upplýsingum frá veðurfræðingi á Veðurstofu Íslands er spáð miklum hlýindum á landinu á morgun, sérstaklega á svæðinu frá Tröllaskaga og austur á Austfirði. Er möglegt að hitamet febrúarmánaðar falli.

Hæsti hiti sem mælst hefur í febrúar hingað til mældist á Eyjabökkum norðan Vatnajökuls 12. febrúar 2017 og náði hitinn þá 19,1 gráður.

Tölur upp á 17 til 18 gráður og jafnvel hærri gætu mælst á Austurlandi á morgun og eru Vopnafjörður, Seyðisfjörður og Neskaupsstaðir líklegir til að mælast hlýjustu staðirnir.

Veðurhorfur á landinu:

Sunnan 10-18 m/s og rigning eða súld, en úrkomuminna austanlands. Hiti 6 til 13 stig.Hvessir í nótt, sunnan og suðvestan 15-25 m/s í fyrramálið, hvassast í vindstrengjum á norðvestanverðu landinu. Áfram vætusamt sunnan og vestantil, annars þurrt að kalla. Hiti 8 til 18 stig, hlýjast austanlands. Dregur úr vindi og úrkomu síðdegis á morgun og kólnar í veðri.

Á föstudag:

Vaxandi suðaustanátt með rigningu, 13-20 m/s síðdegis. Hægari vindur og þurrt að kalla norðanlands fram á kvöld. Hiti 4 til 10 stig.

Á laugardag:

Líkur á sunnan hvassviðri eða stormi um morguninn með rigningu eða slyddu, en þurrt norðaustantil á landinu. Lægir þegar kemur fram á daginn, sunnan 5-10 seinnipartinn með éljum eða slydduéljum á sunnanverðu landinu, en þurrt annarstaðar. Kólnandi veður, hiti kringum frostmark undir kvöld.

Á sunnudag:

Breytileg átt 3-8 og yfirleitt úrkomulaust, en norðan 8-15 og snjókoma á Vestfjörðum og með norðurströndinni. Frost 0 til 8 stig, mest inn til landsins.