Jar­oslava meðal hinna hand­teknu í Hval­fjarðar­ganga­málinu

Jaroslava Davidsson, ekkja Ásgeirs Davíðsson - Geira á Goldfinger, er meðal þeirra fimm sem lögreglan handtók um helgina síðustu í og við Hvalfjarðargöng. Þetta hefur Vísir eftir áreiðanlegum heimildum. Um er að ræða umfangsmikið fíknefnamál þar sem grunur er framleiðslu á amfetamíni hér á landi.

Við handtökuna við Hvalfjarðargöngin voru gerð upptæk nokkur kíló af amfetamíni. Aðgerðin var viðamikil en að henni komu lögreglan á höfuðborgarsvæðinu, lögreglan á Vesturlandi auk sérsveitar lögreglunnar.

Nýlega féll dómur í máli þar sem þrír fengu sex til sjö ára fangelsisdóma vegna framleiðslu á amfetamíni í sumarbústað í Borgarfirði.

Góðkunningjar lögreglunnar

Samkvæmt frétt Ríkisútvarpsins af málinu eru allir nema Jaroslava erlendir ríkisborgarar, allt karlmenn, sem komið hafa við sögu lögreglu áður. Lögreglan á höfuðborgarsvæðinu hefur framkvæmt húsleit á í að minnsta sjö stöðum vegna rannsóknar málsins. Það staðfestir Karl Steinar Valsson yfirlögregluþjónn.

Þau hin handteknu hafa öll verið úrskurðuð í tveggja vikna gæsluvarðhald en málið telst að mestu upplýst.

Jaroslava er þjóðþekkt kona, hún er af rússnesku bergi brotin, kom hingað frá Eistlandi hvar hún bjó 1998 til að dansa en giftist Geira á Goldfingar, Ásgeiri Davíðssyni, sem var 22 árum eldri en hún. Jaroslava, sem ávallt er kölluð Jara, tók fullan þátt í rekstri nektarstaðarins umdeilda sem lengstum var rekinn í Kópavogi.

Konan á bak við Geira

Við fráfall Geira, en hann varð bráðkvaddur að heimili sínu í apríl árið 2012, tók Jaroslava við rekstri Goldfinger. Hún seldi hins vegar reksturinn í fyrra og var af því tilefni í viðtali við Lilju Katrínu Gunnarsdóttur ritstjóra DV.

„Já, ég var alltaf konan á bak við Geira.

Ég sagði oft að ég hefði sterkan vegg fyrir framan mig,“ sagði hún þá. En þar kemur fram að samskipti við dansara og starfsmannahald hafi verið meðal þess sem var í verkahring Jaroslövu.

Hin rússneska harka

„Ég hef alltaf farið eftir lögum og allar stelpurnar sem hafa dansað hér hafa verið með íslenska kennitölu og borgað sína skatta. Ég vil hafa allt uppi á borðum því ég vil sofa á nóttunni. Ég nenni ekki neinum „monkey business“. Það er betra að hafa hreina og góða samvisku,“ sagði Jara meðal annars.

Þórarinn Þórarinsson blaðamaður ræddi áður við Jöru en sjá má viðtal hans við hina litríku konu hér neðar en þar segist hún meðal annars búa yfir því sem hún kallar hina rússnesku hörku.