Efnilegir göngugarpar úr Kópavogi hafa Laugaveginn út af fyrir sig

Nemendur í 8. bekk Smáraskóla eru í þessum töluðu orðum að nálgast Emstrur á árlegri Laugavegsgöngu sinni. Um er að ræða áralanga hefði í Smáraskóla sem oftast er farin við upphaf skólagöngu í 8. bekk. 

Vilhelm Gunnarsson, ljósmyndari Vísis, fylgdist með þessum galvöskum krökkum vaða Bláfjallahvísl í nágrenni Hvanngils í dag. Ekki var að sjá á krökkunum að kuldinn í ánni væri nokkurt vandamál.

Hópurinn gisti fyrstu nóttina í skálanum í Hrafntinnuskeri, þá næstu í skálum við Álftavatn en hvor dagleið er um tólf kílómetrar. Dagleiðin í Emstrur, ganga dagsins, er fimmtán kílómetrar og býður upp á tvær ár sem þarf að vaða. Á morgun stefnir hópurinn svo á að ganga í Langadal í Þórsmörk sem er um 15 kílómetra leið sömuleiðis þar sem vaða þarf eina á á lokasprettinum.

Rólegt er á Laugaveginum á þessum tíma árs og sérstaklega í ár eftir hertar aðgerðir á landamærum. Fyrir vikið má segja að krakkarnir úr Kópavogi hafi þessa vinsælustu gönguleið Íslands út fyrir sig. 

Gengið hefur á með skúrum hjá hópnum í dag sem heldur ótrauður áfram göngu sinni.