Víðir laus úr sóttkví

Víðir Reynisson, yfirlögregluþjónn hjá almannavarnadeild ríkislögreglustjóra, er laus úr sóttkví.

Hann segir í samtali við Vísi að hann hafi fengið neikvæða niðurstöðu í gærkvöldi úr skimun sem hann fór í í gær og kveðst aðspurður vera við góða heilsu.

Víðir verður því á sínum stað á upplýsingafundi almannavarna og landlæknis um kórónuveirufaraldurinn sem verður klukkan 14 í dag ásamt Ölmu Möller, landlækni.

Víðir var settur í sóttkví eftir að hafa farið í viðtal á Rás 2 í síðustu viku. Þar átti hann í samskiptum við starfsmann stöðvarinnar sem talinn var vera mjög smitandi þann dag sem Víðir hitti hann.

Fréttin hefur verið uppfærð.