Hoppandi hvalir í bak­garðinum og drauma­húsið að veru­leika

„Það eru engin mörk og hafa aldrei verið en mér hefur alltaf fundist best að vinna þar sem ég bý. Stundum er það ákveðin áskorun, en þetta er allt einn suðupottur og mér finnst best að hafa hann bara á einum stað,“ segir listakonan og ilmvatnshönnuðurinn Andrea Maack í viðtali við Vísi. Ilmvatnsmerkið ber nafn Andreu og eru ilmirnir seldir í 22 löndum í dag. 

Andrea hefur í gegnum tíðina fengið mikið lof fyrir einstakan stíl og er hún áberandi í hönnunar- og tískuheiminum á Íslandi sem og erlendis. 

 Andrea og maður hennar, Gísli Sverrisson eru að byggja 300 fermetra hús á Reykjanesi sem verður bæði vinnustofa, sýningarsalur (showroom) og heimili fjölskyldunnar. Lóðin sjálf er 1300 fermetrar, með útsýni út á sjó og er staðsett í stórbrotinni náttúru. 

Byrjaði allt sem hóteldraumur

Húsið hefur fengið nafnið Geopark Villa en Andrea hefur verið dugleg að sýna frá framkvæmdum og hugmyndavinnu á samfélagsmiðlum sínum.

„Reykjanesið er skráð á Unesco sem Global Geopark svo að mér fannst það liggja beinast við að nota nafnið Geopark Villa. Það er auðvitað einstakt í því samhengi að byggja á svona stað, enda finnst þeim erlendu aðilum sem koma að verkefninu það mjög merkilegt að geta byggt á stað sem er á skrá hjá Unesco.“

Hugmyndina segir Andrea hafa byrjað sem hótel hugmynd en hótelrekstur er starfsgrein sem hefur lengi loðað við móðurætt hennar í gegnum árin.

„Ég var búin að vera að hugsa þetta lengi og setti þetta niður á visionboard hjá mér fyrir nokkrum árum. Þetta byrjaði sem hótel hugmynd en mig hefur alltaf langað til að eiga og reka lítið boutique hótel. Hótelrekstur er mér í blóð borin en afi minn í móðurætt starfaði sem hótelstjóri út um land allt en einnig hafa mamma og frænkur mínar unnið við hótelstörf á einhverjum tímapunkti.“

Í gegnum vinnu sína segist Andrea oft hafa fengið fyrirspurnir frá erlendum samstarfsaðilum og erlendum fjölmiðlum um að fá að koma í heimsókn til Íslands og skoða vinnustofuna og landið. 

„Fólk langar að koma í heimsókn til Íslands og skyggnast bak við tjöldin og því fannst mér þetta góð hugmynd að sameina þetta allt á einum stað.“

Hannar viðarvegg í samstarfi við erlent parketfyrirtæki

Hver sá um hönnunina á húsinu sjálfu?

„Ég og maðurinn minn hönnuðum húsið og svo tók ég mikið að mér að sjá um innanhússhönnunina. Ég fékk til liðs við mig ýmsa aðila í samstarf en sá stærsti er ítalska hönnunarfyrirtækið Molteni C. Í þessu ferli fær myndlistamaðurinn í mér að njóta sín. Sem dæmi fékk ég franskt parketfyrirtæki sem heitir Oscarono í samstarf við mig til að gera stóran viðarvegg sem er innblásinn af ilmvatnsflöskunni minni.“

Sjávarútsýni efst á óskalistanum

Þegar leitin að réttu staðsetningunni byrjaði segir Andrea að þau hafi fyrst og fremst leitað eftir svæði með sjávarútsýni.

„Sjávarútsýni var efst á óskalistanum hjá okkur og við enduðum á því að finna þessa lóð í innri Njarðvík sem hentaði fullkomlega. Þar er mjög fallegt sjálvarútsýni og svo spillir mosinn, hraunið og allt þetta ótrúlega fallega landslag ekki fyrir. Ofan á það að geta verið nálægt flugvellinum. Ég geri mér auðvitað grein fyrir því að það eru ekki mörg flug í augnablikinu en ég er vön því að ferðast mikið vegna vinnunnar minnar. Rétt hjá er einnig glænýtt skólahverfi fyrir drenginn okkar og það eiginlega seldi okkur þessa staðsetningu strax.“

Við hönnun hússins segir Andrea að þau geri ráð fyrir því að geta tekið á móti gestum og verður sérstakt rými í húsinu með góðri gestaaðstöðu.

Hoppandi hvalir, norðurljós og bleikar sumarnætur

„Húsið skiptist í stórt alrými fremst í húsinu en þar er eldhús, stofa og borðstofa sem við hugsum líka sem almennt rými þar sem við getum verið með viðburði og sýningarsal.“

Þar er sjávarútsýnið einstakt og um daginn sáum við meira að segja hvali fyrir utan hjá okkur sem tóku nokkur góð stökk. Auðvitað vonumst við til þess að þeir geri það eftir pöntun.

Alrýmið segir Andrea vera algjöran „Wow factor“ og þar muni gestaaðstaðan einnig vera staðsett.

„Á hægri hlið hússins verður svo útisvæði sem ég er eiginlega mest spenntust fyrir. Þar verður heit laug, gufa, útisturta og stórt útisvæði þar sem hægt er að slappa af við útiarinn. Norðurljósin og bleiku sumarnæturnar verða dásamlegar þarna. Svo þegar veður leyfir, svona tvisvar á ári, haha! Þá getum við verið með útiviðburði þarna líka.“

Finnur þú fyrir miklum áhuga á Íslandi hjá erlendu samstarfsfólki?

Já, ég hef alltaf fundið fyrir því frá því að ég byrjaði og mikið af samstarfsaðilum og fjölmiðlum komið að heimsækja okkur í gegnum tíðina. Í dag eru þeir flestir góðir vinir okkar. Það er nú þegar kominn langur listi af fólki sem vill koma og heimsækja okkur í villuna og búin að panta húsaskipti.

Mun ekki sakna borgarlífsins

Hvernig hafa framkvæmdirnar gengið hingað til? 

„Ótrúlega vel og við eum nokkurn veginn á áætlun. Ég hef voðalega mikið sett þetta í hendurnar á Gísla sem ég treysti 100% fyrir þessu öllu. En það sem hefur komið mér mest á óvart er hvað þetta hefur gengið hratt fyrir sig miðað við flókna hönnun. Það er allt annað mál að steypa upp hús frá grunni heldur en að fara í einingar, en það gefur líka miklu meira af möguleikum.“

Andrea segist ekki hafa áhyggjur af því að hún muni sakna borgarlífsins og segir hún marga vini síni erlendis vera vanir þessari vegalengd í borgina.

„Satt að segja fer ég mjög lítið í miðbæinn. Ég hafði séð fyrir mér að skjótast frekar um helgar til London, Milano eða París í staðinn fyrir að fara til Reykjavíkur en það var auðvitað fyrir heimsfaraldurinn.“

Mér fannst ein vinkona mín lýsa þessu best, þú býrð til þína eigin orku á þínum stað og getur svo stjórnað því vel hvaða og hvenær önnur orka kemur og fer. 

Fyrir þá sem hafa áhuga á því að fylgjast með hönnunarferlinu og sjá myndir af hugmyndavinnu og fleiru þá er bæði hægt fylgjast með á HEIMASÍÐU ANDREU MAACK og  á INSTAGRAM GEOPARK-VILLA.