Hrekkjavaka verði haldin heima í ár

Almannavarnadeild ríkislögreglustjóra hvetur landsmenn sem hyggjast halda upp á hrekkjavöku að gera það einungis heima fyrir og það í fárra manna hópi. Víða verður haldið upp á hrekkjavöku á laugardaginn, 31. október, en vinsældir hrekkjavöku hér á landi hafa farið ört vaxandi hér á landi undanfarin ár.

Í ljósi kórónuveirufaraldursins ráðleggja almannavarnir öllum þeim sem hyggjast fagna hrekkjavöku að gera það einungis heima, öryggisins vegna, að því er fram kemur í tilkynningu á Facebook-síðu almannavarna í dag.

„Að teknu tilliti til þess að enn er í gildi neyðarstig almannavarna vegna COVID-19 hvetja almannavarnir foreldra og forráðamenn að halda upp á hrekkjavökuna með börnum sínum með öðru sniði í ár. Veiran getur svo auðveldlega smyglað sér á milli staða og einstaklinga enda snertifletirnir margir þegar gengið er hús úr húsi til að fá sælgæti. Áhættan við að fá smit er afar mikil eins og staðan er núna,“ segir meðal annars í færslunni.

Þá eru foreldrar og forráðamenn hvattir til að kynna sér hugmyndir sem samtök Heimilis og skóla tóku saman um hvernig fagna megi hrekkjavöku með öruggum hætti.