Hviður gætu farið í allt að 35 metra á sekúndu

Á vef Veðurstofunnar segir að spáð sé norðaustan 18 til 25 metrum á sekúndu. Hvassast verði í Öræfum og Mýrdal þar sem búast megi við vindhviðum sem gætu farið í allt að 35 metra á sekúndu og jafnvel yfir það.

Veðrið gæti verði varasamt ökutækjum sem eru viðkvæm fyrir vindum. Viðvörunin tók gildi á miðnætti í nótt og gildir til miðnættis í kvöld.

Í hugleiðingum veðurfræðings segir að á morgun muni hvessa dálítið og að áfram verði hvassviðri og stormur suðaustanlands en einnig norðvestantil, innarlega á Breiðafirði og á sunnanverðum Vestfjörðum.

Þá verður áfram rigning austantil á landinu en hún er orðin dálítið þrálát, eins og það er orðað í hugleiðingunum, og útlit fyrir að svo verði eitthvað áfram. Hiti eitt til níu stig.

„Þegar líður á vikuna kólnar dálítið aftur og fer að slydda eða snjóa fyrir norðan, en áfram þurrt að kalla sunnan heiða. Í lok vikunnar er svo útlit fyrir norðanátt með snjókomu og éljum um allt norðanvert landið og hita undir frostmarki í felst öllum landshlutum,“ segir í hugleiðingum veðurfræðings.

Veðurhorfur á landinu:

Norðaustan 10-18, en 18-25 m/s suðaustantil. Rigning á Suðausturlandi og Austfjörðum, en dálítil væta af og til í öðrum landshlutum. Norðaustan 13-18 á morgun og áfram hvassara við suðausturströndina en einnig norðvestantil. Hiti 1 til 9 stig, hlýjast sunnan heiða.

Á þriðjudag:

Norðaustan 13-18 m/s, en 18-23 við suðausturströndina og staðbundið norðvestanlands. Rigning á austanverðu landinu og slydda með norðurströndinni, en annars þurrt að kalla. Hiti 1 til 7 stig, mildast syðst.

Á miðvikudag og fimmtudag:

Norðaustanstrekkingur og dálítil snjókoma eða slydda norðanlands, rigning austast og þurrt sunnan heiða. Hiti 0 til 6 stig, svalast í innsveitum nyrðra.

Á föstudag:

Áframhaldandi norðaustanátt og rigning eða slydda með köflum, en þurrt að kalla á Suður- og Vesturlandi. Heldur kólnandi veður.

Á laugardag:

Norðan- og norðaustanáttir með slyddu eða snjókomu, en þurrt sunnan heiða. Hiti kringum frostmark.

Á sunnudag:

Útlit fyrir norðanátt með snjókmu og éljum um norðanvert landið, en áfram þurrt sunnantil. Frost um mest allt land.