Segir best að varast dellur og tískustrauma

„Það er pítsunni að þakka að ég, bakarinn, áttaði mig á því að ég hefði nef fyrir viðskiptum.“

Þórarinn var gestur Gunnars Dofra Ólafssonar í nýjasta hlaðvarpsþættinum Leitin að peningunum þar sem rætt er um fjármál einstaklinga.

Þórarinn segir pítsuna vekja allt önnur hughrif en annar skyndibiti þar sem ameríska pizzan sé matarmeiri en sú ítalska. Því geti fleiri en einn deilt henni.

„Eins getur hún alltaf endurnýjað sig. Þegar ég byrjaði í þessum bransa voru sveppir aðalmálið. Í dag er staðan önnur og ný álegg eins og döðlur komnar ofan á pítsur landsmanna. Pítsan er dáð og keypt af öllum aldurshópum. Eldri borgarar eru sem dæmi mikilvægur viðskiptahópur á Spaðanum,“ segir Þórarinn.

Hann bætir við að hann hafi ekki verið sáttur að hætta hjá Dominos á sínum tíma. Því tók hann pítsuna upp og fór að selja pítsudeig hjá IKEA. Deigið hafi fljótt orðið söluhæsta varan í allri búðinni.

Sósíalistaforinginn Gunnar Smári innblástur Spaðans

Þórarinn er hægri maður í pólitík og því er nokkuð skondið að hugmyndin að Spaðanum hafi kviknað út frá Gunnari Smára Egilssyni, stofnandi Sósíalistaflokks Íslands. Hann greindi frá því á sínum tíma þegar hann lét dóttur sína fá tvö þúsund krónur til að kaupa pítsu. Dóttirin fór að hlæja. 

Gulli og Heimir í Bítinu á Bylgjunni fréttu af þessu og höfðu þá samband við Þórarinn og vildu vita hvort þetta gengi upp, að hægt væri að framleiða og selja pítsu á slíku verði.

Þórarinn fór að reikna og sá strax að álagningin væri mikil og að hægt væri að lækka verðin á pítsunni um þúsund krónur. Í framhaldinu hafi hann farið á fullt í að opna Spaðann.

Pálmi og Ingvar fyrirmyndir

Þórarinn segist hafa tileinkað sér tvær fyrirmyndir þegar kemur að viðskiptum. Ingvar Kamprad, stofnanda IKEA, og Pálma Jónsson sem gjarnan er kenndur við Hagkaup. Pálmi stofnaði IKEA á Íslandi.

Hann segir bæði Pálma og Ingvar hafa haft tvö leiðarljós við rekstur fyrirtækja sinna, að hugsa vel um rekstur fyrirtækisins og gera vel við almenning. Þessi hugsun hafi einkennt allan ferill Þórarins.

Þórarinn segist engan áhuga hafa á að vera ríkasti maðurinn í götunni en vill geta ferðast, veitt í góðum ám með vinum og borðað góðan mat.

Bíladella á háu stigi

„Verstu ákvarðirnar tengjast nær allar bílum en ég er með mikla bíladellu og finnst gaman að eiga óvenjulega bíla. Gallinn við slíka bíla er að það er oft erfiðara að selja þá aftur,“ segir Þórarinn sem keyrir í dag á tíu ára gömlum jeppa og segist stefna að fjárhagslegu sjálfstæði.

Hann segir reynsluna hafa kennt sér að tískan geti verið dýr. Besta sparnaðarráðið til Íslendinga sé að varast dellur og tískustrauma. Þannig sé skynsamlegra að kaupa frekar ódýra eldhúsinnréttingu í IKEA og geta skipt út hurðum og borðplötum eftir tíu ár þegar þessi tiltekna gerð innréttingar sé komin úr tísku.

Þórarinn segist elska að elda mat og bendir á að það sé alltaf ódýrara að elda en að kaupa tilbúinn mat. Þá mælir hann með að hundsa dagsetningar á matvælum, það sé alveg nóg af lykta af mat og bragða.

Hlaðvarpið Leitin að peningunum er framleitt af umboðsmanni skuldara með stuðningi frá félagsmálaráðuneytinu.