Framkonur mættu með fullan poka af jólagjöfum á Barnaspítala Hringsins

Framkonur sýndu frábært fordæmi á dögunum en „þær vildu sýna að lífið er ekki bara fótbolti og að á þessum erfiðu tímum sem við höfum gengið í gegnum þetta árið skiptir máli að standa saman, hjálpast að og reyna að gera heiminn örlítið betri,“ eins og segir á heimasíðu Fram.

Leikmenn liðsins tóku sig saman og söfnuðu pening fyrir leikföngum sem fulltrúar liðsins, ásamt þjálfara, afhentu Barnaspítala Hringsins í dag, fimmtudaginn 17. desember.

Barnaspítalinn tók fagnandi á móti gjöfinni og liðið fékk í staðinn viðurkenningarskjal sem er að mörgu leyti betri en nokkur bikar.

Framliðið spilaði í 2. deild kvenna í sumar og endaði þar í sjöunda sæti.