„Ég var skítlogandi hræddur eins og allir“

„Ég var náttúrlega skítlogandi hræddur eins og allir aðrir,“ segir Bjarki sem taldi að sitt síðasta væri upp runnið.

„Já ég stóð beint undir þessu þegar þetta féll. Það voru 15 manns sem lentu inni í þessum þríhyrningi sem myndaðist þegar flóðið féll. Það fellur fyrir ofan björgunarmiðstöðina, þar sem aðgerðarstöðin var staðsett,“ segir Bjarki.

Bjarki segir að hin miklu skriðuföll hafi átt sér talsverðan aðdraganda. Alla vikuna áður en hún féll höfðu verið smáspýjur, eins og Bjarki kallar þær, stór og smá skriðuföll, hingað og þangað og þegar höfðu fjölmörg hús verið rýmd. Þá þegar höfðu 120 manns yfirgefið hús sín og voru á hótelum og/eða annars staðar. Bjarki segist ekki muna eftir öðrum eins rýmingum. Íbúðarhúsin sem fóru voru tóm. Það hafði verið langur aðdragandi að þessu.

Múlinn bjargaði mannslífum

Bjarki segir að það sem hafi orðið honum og öðrum til bjargar var að skriðan klofnaði.

„Ef þú skoðar loftmynd af þessu má sjá að flóðið klofnar á svokölluðum múla sem er hryggur í fjallinu. Hann beinir skriðunni inneftir og úteftir. Og skilur þá eftir smá þríhyrning. Við lentum milli tveggja flóða. Ég kalla hann nú Mósesmúla. Hann bjargaði okkur öllum.“

Bjarki segir að skriðan hafi verið mikil.

„Svakalegt þegar skriðan kemur fram af klettunum. Heill veggur af aur og drullu. 

Ég áttaði mig strax á því að þetta væri miklu stærra en Seyðfirðingar hafan nokkru sinni upplifað. Ég var með örlítið meiri vitnesju um skriðusögu Seyðisfjarðar en gerist og gengur. Þarna var einhver allt annar kraftur sem þarna losnaði úr læðingi.“

Menn sáu sitt óvænna. Nokkrir reyndu að hlaupa í skjól en Bjarki segist hafa gert sér grein fyrir því að gagnvart þessu væri lítið skjól að hafa undir vegg einhverra húsakofa.

„Ég tók til fótanna. Ætlaði að reyna að komast fyrir tungurnar, taldi það einu leiðina til að lifa þetta af, eftir að ég sá flóðið koma fram af klettunum. Breitt og stórt. 

Þannig að ég klifraði uppí mastur sem þarna var og sé að það sem fer utan við mig sprengir allt sem fyrir verður. Skriðan fyrir innan virtist renna hægar. Ég sá hlaupaleið þar fram hjá.“

Ytri taumur skriðunnar tætti allt á undan sér

Allt gerðist þetta frekar hratt. Hann sá að skriðan braut niður hús vinar hans innar, svokallað Framhús. Það gerðist hratt.

„Ég stökk niður úr mastrinu og náði að hlaupa fyrir húsið og út á Hafnarhús. Ég hélt að það væru allri feigir fyrir aftan mig. En áttaði mig svo á að öll húsin sem við vorum við stóðu. Þetta var áhugaverð lífsreynsla vægast sagt. Það var eins og múlinn hafi tekið aflið úr tungunni sem fór inneftir. Sú skriða var fljót að missa kraftinn mean hin virkaði eins og snjóflóð, tætti allt á undan sér.“

Bjarki segist hafa heyrt einhverja tala um höggbylgju áður en skriðan féll, eða þrýsting eins og gerist þegar stór snjóflóð falla. Hann er nú kominn heim. Heimili hans, konu hans og sonar, er undir svonefndri A-línu en svæðið skiptist í A-, B- og C-línur.

„Ég er á öruggu svæði og mátti fara heim fljótlega. Ég er nú að huga að jólagjöfum, setja í þvottavél og svoleiðis. Ég hef ekki haft tíma til eins né neins. Veit ekki hvort það er sósublettur á skyrtunni,“ segir Bjarki sem er furðanlega rólegur vegna alls þessa sem hefur gengið á í bænum.

Einstakur atburður

„Ég var eins og allir bæjarbúar, logandi hræddur, en ég er temmilega kærulaus og er eins og er góður,“ segir Bjarki hvort hann þurfi þá enga áfallahjálp. „Nei. En ég þarf víst að hitta sálfræðing. Allir lögreglumennirnir á svæðinu verða skikkaðir í það. Ég er auðvitað ánægður að enginn dó en mér finnst þetta afar áhugaverð lífsreynsla. Enginn sem nokkru sinni hefur búið á Seyðisfirði frá landnámi hefur séð svona gerast. Þetta er merkilegur atburður.“

Bjarki segir að sjá megi ummerki í jarðlögum sem bendi til þess að árið 750 hafi eitthvað svipað gerst á staðnum.

„Við erum einu manneskjurnar sem höfum sé þetta gerast. Þó þetta sé hræðilegt þá er þetta jafnframt en áhugavert. Ég hef alltaf haft mikinn áhuga á skriðuföllum. Og hef búið undir þessum fjöllum alla tíð,“ segir Bjarki sem er borinn og barnfæddur Seyðfirðingur. Fór suður í skóla en hefur alltaf ýmist búið þar eða verði með annan fótinn á staðnum.

„Ég er alinn upp við skriðuföll en ekkert af þessum skala. þetta er „beond“ allt sem hugurinn nær utan um.“

Svona horfði atvikið ,sem Bjarki lýsir hér frá sínu sjónarhorni, við eiginkonu hans: