Jólin geta verið stressmartröð fyrir sambönd

Í vikunni fyrir jól spurðu Makamál lesendur Vísis hvort að jólaundirbúningurinn væri að valda óþarfa álagi á sambandið. Tíminn sem er í raun stærsti hluti jólanna. Þessi tími sem við notum í að baka, kaupa gjafir, skreyta, spila, drekka kakó og borða óskynsamlega mikið af smákökum. 

Allt eru þetta hlutir sem auðvelt er að njóta og ættu bara aldrei að verða að kvöð. Það er ekki kvöð að njóta. Við þurfum ekki að gera alltaf ALLT eins og hinir eða allt eins og við höfum ALLTAF gert. Það er misjafnt hvers við njótum og það er líka mjög misjafnt hversu mikinn tíma við höfum til þess að njóta.

 Þegar við erum yfirkeyrð, þreytt og pirruð er glansandi klósettskál og jólasmákökur eins og amma gerði ekki að fara að redda málunum og færa okkur hinn heilaga jólanda, ó nei. 

Öll þrifin, réttu servíetturnar, fullkomna jólatréð, innpökkunarpappír í stíl við skreytingarnar, besta jólailmkertið og átta smákökutegundir geta því auðveldlega breyst úr rómantískum krúttlegum jólaundirbúningi í algjöra stressmartröð. 

Gæti mögulega verið að við þyrftum að endurskilgreina jólaundirbúninginn? Í stað þess að skrifa niður óþarflega langan verkefnalista fyrir jólin væri kannski ráð að setjast niður og tala saman um það sem okkur langar að fá út úr jólunum og þessum tíma saman. Hvað er raunhæft að undirbúa, hvað viljum við undirbúa og gera saman um hátíðarnar. Setjum ekki óraunhæfar kröfur á okkur sjálf eða maka okkar sem verður bara til þess að valda álagi. 

Samkvæmt niðurstöðum könnunarinnar segir um helmingur lesenda Vísis að jólaundirbúningurinn valdi óþarfa álagi á sambandið. 

Niðurstöður*:

KARLAR:

Já, alltof miklu  - 18%

Já, frekar miklu -14%

 Já, litlu -16%

Nei, engu - 52%

KONUR:

Já, alltof miklu - 12%

Já, frekar miklu - 17%

Já, litlu - 21%

Nei, engu - 50%

*Tekið skal fram að niðurstöður byggjast eingöngu á svörum lesenda Vísis og því ekki hægt að alhæfa um niðurstöður. Kannanir Makamála eru ætlaðar til skemmtunar og til að vekja umræðu og athygli á ýmsum málefnum.