Liverpool stráði salti í gamalt sár Eiðs Smára á miðlum sínum í gær

Frægasta færaklúður Eiðs Smára Guðjohnsen í Chelsea búningnum var rifjað upp á miðlum Liverpool í gær en hefði Eiður Smári skorað á Anfield fyrir fimmtán árum síðan hefði ekki orðið neitt Istanbul ævintýri hjá Liverpool vorið 2005.

Liverpool rifjar upp að það eru fimmtán ár síðan að félagið vann Evrópukeppni meistaraliða í fimmta sinn. Úrslitaleikurinn var vissulega dramatískur en það má líka segja um enskan undanúrslitaleik liðsins.

Í undanúrslitaleiknum mætti Liverpool liði Chelsea og var seinni leikurinn á Anfield. Liðin gerðu markalaust jafntefli í fyrri leiknum á Stamford Bridge.

Í gærkvöldi voru síðan nákvæmlega fimmtán ár síðan að Liverpool vann Chelsea í baráttunni um sæti í úrslitaleik Meistaradeildarinnar eða 3. maí 2005.

Luis Garcia kom Liverpool í 1-0 strax á fjórðu mínútu með umdeildu marki en margir eru á því að boltinn hafi aldrei farið yfir línuna.

Chelsea fékk 86 mínútur til skora og tryggja sér sæti í úrslitaleiknum. Íslenski framherjinn var sá sem komst líklega næst því að skora. Eiður Smári Guðjohnsen var nefnilega ótrúlega nálægt því að koma Chelsea áfram í úrslitaleik Meistaradeildarinnar þetta kvöld.

Færið má sjá hér að neðan.

Eiður fékk boltann í teig Liverpool þegar 40 sekúndur voru eftir af uppbótartíma leiksins. Eiður Smári var við markteigshornið en Jerzy Dudek, markvörður Liverpool, var farinn úr markinu eftir að hafa farið út í fyrirgjöf. Á marklínunni voru því aðeins nokkrir varnarmenn Liverpool.

Eiður Smári lagði boltann fyrir sig og skaut en boltinn fór í læri, Jamie Carragher, varnarmanns Liverpool og þaðan sigldi það rétt framhjá fjærstönginni.

Liverpool slapp með skrekkinn og tryggði sér síðan sigur í Meistaradeildinni eftir ótrúlegan endurkomusigur á AC Milan í Istanbul.

Hér fyrir neðan má sjá tvær myndir af umræddu færi Eiðs Smára af miðlum Liverpool.

Jamie Carragher var magnaður í þessum leik og átti mikinn þátt í því að skot Eiðs Smára fór framhjá en ekki í netið. „Það er með ólíkindum hvað drengurinn lék vel, alveg með ólíkindum,“ sagði Steven Gerrard, fyrirliði Liverpool, um frammistöðu Jamie Carragher.

Jose Mourino, knattspyrnustjóri Chelsea, hafði unnið Meistaradeildina með Porto árið á undan en varð nú að sætta sig við svekkjandi tap. „Enginn veit hvort þetta var mark eða ekki. Aðstoðardómarinn veit það ekki einu sinni, en eftir að dómarinn dæmdi markið var aðeins annað liðið sem lék knattspyrnu. Hitt liðið gerði ekkert nema verjast. Ég held því að betra liðið hafi tapað í kvöld og við erum auðvitað mjög vonsviknir út af því,“ sagði Jose Mourinho en Eiður Smári spilaði allar 90 mínúturnar í þessum mikilvæga leik.

Eiður Smári Guðjohnsen komst aldrei nærri því að spila til úrslita í Meistaradeildinni með Chelsea en fjórum árum síðar fór hann alla leið með Barcelona liðinu þó svo að hann hafi ekki fengið að spila í sjálfum úrslitaleiknum.