Sagði að það væri áhætta fyrir Man. City að fá „áhugalausan“ Messi

Messi kom Barcelona yfir með marki úr vítaspyrnu á 25. mínútu en eftir það tók PSG, og þá aðallega Kylian Mbappé, yfir. Frakkinn sýndi allar sínar bestu hliðar í gær og skoraði þrennu.

Cole fannst hins vegar ekki mikið til frammistöðu Messis í leiknum á Nývangi koma. 

„Hann leit út fyrir að vera áhugalaus. Það er mjög erfitt fyrir fyrrverandi fótboltamann að gagnrýna hann því hann er snillingur og sá besti í sögunni en í dag leit hann ekki út fyrir að vera andlega tilbúinn,“ sagði Cole á BT Sport.

„Hann er leiðtogi eins og [Gerard] Pique og [Sergio] Busquets. Hryggjarstykkið í Barcelona-liðinu virkar aumt og það hrundi.“

Samningur Messis við Barcelona rennur út í sumar og hann hefur meðal annars verið orðaður við Manchester City. Cole segir að Pep Guardiola, knattspyrnustjóri City, ætti að hugsa sig tvisvar um að fá Messi eftir frammistöðu hans í gær.

„Þetta er áhætta ef 34 ára Messi spilar eins og hann gerði í kvöld. Að bæta honum við lið þar sem Guardiola leggur áherslu á orku, ákefð og samheldni,“ sagði Cole.

„Það gæti orðið erfitt fyrir hann að koma inn í þessi bestu lið því hann þyrfti að spila og hreyfa sig eins og hann gerði fyrir þremur til fjórum árum.“

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.