Elsti hópurinn boðaður í seinni bólusetningu

Fólk á aldrinum níutíu ára og upp úr sem fékk fyrri bólusetninguna gegn kórónuveirunni hinn 2. febrúar verður nú boðað til að koma til að fá seinni sprautuna hjá Heilsugæslu höfuðborgarsvæðisins á Suðurlandsbraut 34 næst komandi þriðjudag. Boð verða send út með smáskilaboðum með tímasetningu fyrir hvern og einn sem heilsugæslan biður fólk að fara eftir.

Þeir sem eru á þessum aldri en hafa ekki fengið smáskilaboð með tímasetningu geta engu að síður mætt milli klukkan níu á þriðjudagsmorgun til klukkan þrjú til að fá seinni bólusetninguna.

Níutíu ára og eldri sem misstu af fyrri bólusetningunni munu einnig fá tímasett boð til að mæta í hana á þriðjudaginn. Heilsugæslan minnir fólk á að mæta með skilríki og með grímu.

Þá er fólk minnt á að bólusett er í axlarvöðva í almennu rými og fólk því beðið um að klæðast stutterma bol innst klæða. Allir þurfi síðan að bíða í fimmtán mínútur að bólusetningu lokinni til að jafna sig.

Fólk með bráðaofnæmi við stungulyfjum eða af óþekktum toga er ekki ráðlagt að fá bólusetningu. Þá er fólk sem ekki ætlar að þiggja bólusetningu beðið um að láta heilsugæsluna vita af því.