Um­mæli í Hlíðamálinu dæmd ómerk en miska­bætur lækkaðar

Landsréttur kvað upp dóm sinn yfir þeim Hildi og Oddnýju klukkan tvö í dag. Rétturinn lækkaði upphæð miskabóta í tilfelli Oddnýjar um 120 þúsund krónur og í tilfelli Hildar um 50 þúsund krónur. Báðar þurfa ða greiða mönnunum hundrað þúsund krónur hvor.

Þá var Oddný dæmd til að greiða um 1,5 milljónir króna og Hildur um 1,5 milljónir króna í málskostnað í ríkissjóð.

Þær Oddný og Hildur voru í héraðsdómi dæmdar til að greiða mönnunum, sem sakaðir voru um nauðgun í Hlíðamálinu, svokallaða miskabætur. Þar voru ummæli sem þær létu falla varðandi málið dæmd ómerk. Sömu ummæli voru dæmd ómerk í Landsrétti utan einna af fimm í tilfelli Oddnýjar.

Oddný var í héraði dæmd til að greiða hvorum karlmanni 220 þúsund krónur í bætur vegna ummælanna. Hildur var dæmd til að greiða þeim 150 þúsund krónur hvorum fyrir sig.

Boðað til mótmæla fyrir utan lögreglustöð

Upphaf málsins má rekja til forsíðufréttar í Fréttablaðinu þann 9. nóvember 2015 með fyrirsögninni „Íbúðin var útbúin til nauðgana“. Boðað var til mótmæla fyrir utan lögreglustöðina á Hverfisgötu í kjölfar fréttaflutnings vegna þess að mennirnir tveir höfðu ekki verið úrskurðaðir í gæsluvarðhald.

Rannsókn málsins leiddi ekki til ákæru og var látin niður falla í júní árið 2016. Voru fjórir fréttamenn fréttastofu 365 dæmdir til að greiða mönnunum miskabætur vegna fréttarinnar.

Ummæli dæmd ómerk

Oddný var ein þeirra sem stóð að fyrrnefndum mótmælunum fyrir utan lögreglustöðina á Hverfisgötu. Hún lét eftirfarandi ummæli falla á mótmælunum sem stefnt var fyrir:

1. „Það er ekki krafist gæsluvarðhalds yfir mönnum sem hefur í að minnsta kosti tvö mismunandi skipti tekist að nauðga konum.“
2. „Ekki nóg með að þeir nauðgi þeim heldur gera þeir það kerfisbundið.“
3. „Í bæði skiptin var bekkjarskemmtun hjá HR, í að minnsta kosti öðru tilfellinu var stúlkunni byrlað ólyfjan, þeir taka þær heim í íbúð til sín og þetta var gert í einhvers konar samstarfi. Planað á milli þessara tveggja manna.“
4. „Að mér skilst var komið í veg fyrir þriðju nauðgunina.“
5. „Þetta eru tveir menn sem hafa í að minnstakosti tvö skipti tekist að nauðga, í eitt skipti var komið í veg fyrir nauðgunina, við vitum ekki hvað hefur gerst áður og þessir menn eru látnir lausir.“

Landsréttur dæmdi fjögur ummæli Oddnýjar – 1., 2., 3., og 5. – ómerk. 

Mennirnir stefndu Hildi hins vegar fyrir eftirfarandi ummæli sem hún lét falla á Facebook:

„... þá gríðarlega alvarlegu aðför lögreglunnar að öryggi kvenna í Reykjavík að láta eiga sig að fara fram á gæsluvarðhald yfir körlum sem nauðga konum SAMAN svo yfirdrifið kerfisbundið að þeir hafa til þess sérútbúna íbúð.“

Ólíkt Héraðsdómi Reykjavíkur dæmdi Landsréttur aðeins hluta þessara ummæla ómerk, það er að segja „...körlum sem nauðga konum SAMAN svo yfirdrifið kerfisbundið...“ . 

Hinn hluti ummælanna taldi Landsréttur að væri endursögn á fréttum, þ.e. varðandi að lögregla taldi ekki þörf á gæsluvarðhaldi yfir mönnunum og varðandi það hvernig íbúðin var útbúin.

Fréttin var uppfærð 22. mars