Saga Sif kemur inn fyrir Steinunni

Arnar Pétursson, þjálfari íslenska landsliðsins í handbolta hefur valið þá 16 leikmenn sem spila gegn Grikklandi í undankeppni HM. Steinunn Björnsdóttir, fyrirliði liðsins, getur ekki spilað vegna meiðsla. 

Markvörðurinn Saga Sif Gísladóttir kemur inn í hópinn fyrir Steinunni, en Saga Sif gæti spilað sinn fyrsta landsleik í kvöld.

Liðið fer því með þrjá markmenn í leikinn í kvöld, en ásamt Sögu Sif eru þær Katrín Ósk Magnúsdóttir og Elín Jóna Þorsteinsdóttir í hópnum.

Leikurinn hefst klukkan 18.00 og verður honum streymt á Youtube, en hægt er að nálgast slóðina með því að smella hér.