Átta ár frá hvarfi Frið­riks: „Búin að upp­lifa mar­tröð sem er ekki hægt að lýsa“

„Til þín þarna úti, til þín sem veist – vilt þú finna kjarkinn og manngæskuna í hjarta þínu til þess að gera það sem rétt er. Lyfta þunganum sem þessari vitneskju fylgir með því að deila henni,“ skrifar Vilborg á Facebook.

Vilborg segist í samtali við fréttastofu orðlaus yfir því hve margir hafi deilt færslunni undanfarinn sólarhring. Meira en þúsund hafa deilt henni á Facebook, rúmlega 600 líkað við hana og hátt í 80 skrifað athugasemd.

„Við vitum að „þessi einhver“ er til. Og, að hann veit hvar Frikki var í Paragvæ fyrir átta árum og hvað gerðist. Ég bið til Guðs að hann finni kjarkinn til að stíga fram og gera það rétta,“ skrifar Vilborg.

Enn í sömu sporum og í apríl 2013

„Við erum í nákvæmlega sömu stöðu og við vorum fyrir átta árum. Spurningin sem brennur á okkar vörum er: Hvar er Frikki?“ segir Vilborg.

Hún segir að í gegn um árin hafi margt komið fram sem hafi hjálpað fjölskyldunni og lögreglu við rannsóknina að hvarfi Friðriks. Þær upplýsingar hafi hins vegar ekki veitt nein svör við spurningunum um það hvar Friðrik sé niður kominn eða hvað hafi komið fyrir hann fyrir átta árum síðan.

„Við fórum í stóra herferð niðri í Paragvæ í lok 2013 og hún skilaði gríðarlega miklu. Við fórum aftur í aðeins öðruvísi herferð árið 2014 út um allt land með plaggöt og það skilaði líka helling af upplýsingum,“ segir Vilborg.

„Þrátt fyrir allt, allt þetta, erum við í sömu sporum og í þessari viku fyrir átta árum. Og við vitum ekki svarið við einu spurningunni sem skiptir máli: Hvar er Frikki.“

„Erum búin að upplifa martröð sem er ekki hægt að lýsa“

Fregnir af hvarfi Friðriks bárust fyrst í apríl 2013. Þann 31. mars reyndi Friðrik tvisvar sinnum að hringja í fjölskyldu sína, á innan við tíu mínútum, án árangurs en eftir það náðist aldrei í hann aftur.

Vilborg hefur tvisvar á ári undanfarin sjö ár birt mynd af Friðriki og fjölskyldu hans á Facebook og minnt á hvarf hans. Hún segir að í gær hafi þyrmt yfir hana að átta ár væru liðin frá hvarfinu.

„Maður vill ekki trúa því hvað er liðinn langur tími og maður vill ekki trúa því að maður standi gagnvart honum, gagnvart hvarfinu sjálfu, jafn ráðalaus og í sömu sporum og í byrjun apríl 2013,“ segir Vilborg.

„Ég ákvað að skrifa ákall til aðila sem við vitum að eru þarna úti sem séu með upplýsingar sem gætu hjálpað okkur fjölskyldunni að ná einhverri lokun, einhverri lendingu. Við erum búin að upplifa martröð sem er ekki hægt að lýsa,“ segir Vilborg.

Hún segist hafa átt von á einhverjum viðbrögðum við Facebook-færslunni en henni hafi ekki komið til hugar að á tæpum 24 tímum væru rúmlega 1000 manns búin að deila færslunni.

„Ef þetta mál hefur kennt okkur eitthvað, bæði hér og í Paragvæ, er það að heimurinn er fullur af afskaplega góðu fólki og afskaplega hjálpsömu fólki sem þú þekkir ekki neitt en kemur með þér í lið þegar svona mannlegar hremmingar koma upp,“ segir Vilborg.

„Málið er ekki búið“

Hún segir að þrátt fyrir tímann sem liðinn er sé málið ekki búið. Fjölskyldan sé sannfærð um að fyrr eða síðar fáist niðurstaða í málið.

„Það sem skiptir okkur máli er að málið er ekki búið. Fyrir þessa fjölskyldu verður þetta mál ekki búið fyrr en hann finnst. Hvort sem hann verður lífs eða liðinn þá verður það ekki búið fyrr en hann finnst og við getum lokað því. Ef það er eitthvað sem þessi stóra fjölskylda hans er sammála um þá er það það,“ segir Vilborg.

„Við værum ekki búin að vera í þessum slag í átta ár, og hvergi nærri hætt, ef við værum ekki sannfærð um að við fengjum niðurstöðu á einhverjum tíma. Hvort sem það gerist í ár, eftir tvö, eftir tíu. Það er ekkert annað í boði en að við fáum að vita, einhvern vegin, einhvern tíma, hvar hann er og hvað gerðist.“