Viðar hjálpaði Selfossi að fá Gary Martin

Gary Martin skoraði 11 mörk fyrir ÍBV í Lengjudeildinni í fyrra, eftir að hafa orðið markakóngur Pepsi Max-deildarinnar 2019 með 14 mörk.

Það kostar skildinginn að semja við slíkan leikmann, til tveggja ára, en höggið er lítið fyrir knattspyrnudeild Selfoss sem leitaði til velunnara og safnaði nægu fé til að fá Martin.

Landsliðsmaðurinn og Selfyssingurinn Viðar Örn Kjartansson er einn þeirra sem sáu til þess að Selfoss yrði næsti áfangastaður Martins. Viðar lék síðast með Selfyssingum árið 2012 en hefur verið atvinnumaður frá árinu 2014 og spilað í Noregi, Kína, Svíþjóð, Ísrael, Rússlandi og Tyrklandi.

Jón S. Sveinsson, formaður knattspyrnudeildar Selfoss, sagði „sex til átta“ aðila hafa lagt til fé svo að hægt yrði að semja við Gary Martin. Hann vildi ekkert segja til um það hvort að Viðar væri einn þeirra sem veitt hefðu deildinni fjárhagslegan stuðning en sagði:

„Það voru allir mjög jákvæðir að bæta aðeins í og hjálpa til út af þessu. Það sýnir samstöðuna í bæjarfélaginu og hjá okkar stuðningsmönnum, sem eru tilbúnir að koma að borðinu þegar þess þarf. Við gefum hins vegar ekkert upp hverjir það eru.“

Fyrsti leikur á morgun

Selfoss vann sig upp úr 2. deild í fyrra og leikur sinn fyrsta leik í Lengjudeildinni á morgun, gegn Vestra á JÁVERK-vellinum kl. 14. Gary Martin er kominn með leikheimild og gæti því spilað þann leik.

Martin var rekinn frá ÍBV fyrir rúmri viku vegna agabrots. Í yfirlýsingu frá honum kom fram að samningi hans hefði verið rift í kjölfar þess að hann dreifði nektarmynd af liðsfélaga sínum á lokaðri spjallrás leikmannahóps ÍBV á Snapchat. Samkvæmt yfirlýsingunni kærði liðsfélaginn Martin til lögreglu.

Gary Martin hefur leikið á Íslandi, með hléum, frá árinu 2010. Hann lék fyrst með ÍA en svo einnig með KR, Víkingi R. og um skamman tíma Val áður en hann fór til ÍBV sumarið 2019.