Ákvað að gera breytingar á lífi sínu þegar tveir vinir kvöddu skyndilega

„Þetta sama ár dóu tveir vinir mannsins míns, annar dó af slysförum, hinn dó úr veikindum og þetta voru menn í fullu fjöri á okkar aldri. Þetta var kveikjan að ákveðnum hugsunum um tilgang lífsins og bara hvað maður vill vera að eyða tíma sínum í,“ segir Snæfríður og bætir við að stórafmæli hennar hafi þar einnig haft áhrif.

Þarna var ég orðin fertug þriggja barna móðir á Akureyri, í snjónum og kuldanum og ég þráði bara eitthvað nýtt.

Snæfríður var gestur Gunnars Dofra Ólafssonar í hlaðvarpinu Leitinni að peningunum. Hún segir að eiginmaður hennar hafi í fyrstu tekið illa í hugmyndir um sólarlandaferð þar sem fjárhagurinn stæði tæpur og fjölskyldan á mörkum þess að ná endum saman.

„Ég var alveg föst á því að við yrðum eitthvað að gera. Mér fannst lífið hreinlega vera að hlaupa frá mér þarna og ég fann leið til að koma okkur út í heim með því að gera íbúðaskipti í lok ársins.“ Fimm manna fjölskyldan endaði á því að fara í fjögurra vikna ferð til Kanaríeyja.

„Þetta var bara yndislegt. Það var alveg geggjað að komast í burtu á miðjum vetri í sól og sumar. Ég náði einhvern veginn að telja manninn minn á þetta með því sýna honum grein þar sem kostnaður jólanna var tekinn saman.“

Lagði Snæfríður til að þau myndu sleppa jólunum þetta árið og fara erlendis í staðinn. Með því að gera íbúðaskipti hýstu þau annað fólk í sinni íbúð á meðan og sluppu við að borga fyrir gistingu.

„Við náðum líka flugmiðum á góðu verði þannig að þetta kostaði eiginlega ekki neitt. Þarna opnaðist alveg nýr heimur og ég varð alveg heilluð af þessum ferðamáta.“

Óþarfi að hafa íbúðina sína tóma

Á næstu árum nýtti fjölskyldan sér íbúðaskipti gríðarmikið og fóru meðal annars til Osló, New York, Sardiníu, Kanaríeyja og í ferðalög innanlands. Með íbúðaskiptum hefur Snæfríður og fjölskylda hennar leyft sér að fara í lengri ferðir en annars.

Hún bendir á að gistikostnaður sé gjarnan mjög stór hluti af ferðakostnaði og það sé óþarfi að láta íbúðina sína standa tóma á meðan fólk sé að ferðast. Fjölmargar skiptisíður megi finna á netinu og sú stærsta sé Homeexchange.com með um 400 þúsund meðlimi.

Snæfríður bætir við að íbúðaskipti geti farið fram á ólíkum tímum og svo sé hægt að skipta með inneignum sem nýta má á viðkomandi íbúðaskiptasíðu. Einnig séu til vefsíður sem geri fólki kleift að passa gæludýr eða veita aðra þjónustu og fá fría gistingu í staðinn.

Hvetur fólk til að yfirgefa sundlaugabakkann

Snæfríður segir að meginmunurinn á íbúðaskiptum og síðum á borð við Airbnb sé að ekki sé greitt fyrir notkunina. Að hennar reynslu getur umgengnin litast af því þar sem fólk gangi oft betur um hluti þegar það fær þá lánaða. Íbúðaskipti gangi út á traust þar sem fólk sé tilbúið að deila heimilum sínum með fólki sem það þekki ekki neitt.

Í dag starfar Snæfríður meðal annars sem rithöfundur, fyrirlesari og ferðafrömuður en hún hefur gefið út bækur um íbúðaskipti, Tenerife, Gran Canaria og flutninga til Spánar.

„Ég hef verið að benda fólki á íbúðaskipti sem mögulegan ferðamáta og hvetja fólk til að fara í aðeins öðruvísi ferðalög, að því leyti að fá meiri upplifun út úr ferðalaginu og sjá aðeins meira en bara hótelið og sundlaugabakkann.“

Myndað tengsl við fólk og eignast vini

Snæfríður býr enn á Akureyri og heldur áfram að stunda íbúðaskipti sem í fyrstu var leið til að spara peninga á ferðalögum.

Núna er ég að nýta þetta kerfi einfaldlega af því að það gefur eitthvað sem ekki er hægt að kaupa fyrir peninga. 

„Það er bara allt önnur upplifun. Ég sá það til dæmis svo skýrt fyrir nokkrum árum þegar stórfjölskyldan fór til Sardiníu.

Ég og maðurinn minn gerðum íbúðaskipti og fengum geggjað hús. Það voru listaverk á veggjunum, geisladiskar með ítalskri tónlist og við komum þarna inn á heimili sem var fullbúið og með svo mikinn karakter. Á sama tíma leigði mágkona mín eitthvað á Airbnb. Það voru einhverjar útprentanir úr IKEA á veggjunum og það var alveg sálarlaust, þó þetta hafi verið fínt hús en við fengum þessa upplifun. 

Það beið gjöf handa okkur frá húsráðanda og fallegt handskrifað bréf. Við vorum með langan lista yfir þeirra ábendingar um hvað ætti að gera og hvað maður ætti að smakka og annað. Það sem svona íbúðaskipti gefa oft eru sambönd milli fólks,“ segir Snæfríður sem kveðst jafnframt hafa eignast góða vini í gegnum fyrirkomulagið.

Hún segir að auðvitað geti komið upp vandamál tengd íbúðaskiptum en að gott samband við þann sem maður skipti við auki líkurnar á að ferlið verði ánægjulegt. Þá sé það ákveðin trygging að skipta við fólk á sama tíma í stað þess að geyma aðra dvölina.

Klöguð til fréttastofunnar

Snæfríður segist í dag nýta peningana sína í ferðalög og fasteignir. Hún keypti sína fyrstu íbúð árið 2001 með lánsveði í íbúð eldri systur sinnar á Akureyri. Þá var Snæfríður í þremur störfum til að fjármagna sín fyrstu kaup. 

Á tímabili vann hún við ræstingar á morgnana áður en hún mætti á fréttamannavakt á Skjá einum.

„Svo var ég að vinna á veitingahúsi um helgar niðri í bæ, alveg þangað til að einhver klagaði til fréttastofunnar. Það var ekkert um það í samningnum en einhverjum fannst það ekki við hæfi að fréttamaður væri að þjóna til borðs á veitingastað. Þá færði ég mig bara í uppvaskið á veitingastaðnum og þannig náði ég að eiga fyrir framkvæmdunum og vera í þremur vinnum.“

Þegar Snæfríður kynntist manninum sínum starfaði hann sem margmiðlunarhönnuður en hann skipti skyndilega um stefnu og gerðist húsasmíðameistari. Á síðustu árum hafa hjónin verið dugleg að kaupa, gera upp og selja íbúðir og eiga nokkrar leiguíbúðir í dag sem hjálpa til við að fjármagna lengri ferðalög.

Vill deila lífeyrisárunum yfir lífið

Snæfríður segist oft heyra að þau séu heppin að vera bæði sjálfstætt starfandi og það sé fjarlægur draumur fyrir venjulegt launafólk að lifa þeirra lífi. Faraldurinn hafi þó sýnt að margir geti unnið víðar en á skrifstofunni og þá þess vegna á Kanaríeyjum ef því er að skipta. Snæfríður telur að aukin reynsla af fjarvinnu eigi eftir að fjölga tímabundnum flutningum til útlanda.

„Þetta er líka erfitt. Það er erfitt að rífa fjölskylduna upp og fara og þetta er auðvitað líka tekjumissir, sérstaklega ef maður er að fara í burtu í lengri tíma. Ég kalla þetta eiginlega að deila lífeyrisárunum yfir lífið.“

Hvetur fólk til að sleppa því að bíða

Snæfríður segir að hjónin fari reglulega í minnst fjögurra vikna ferðalög þar sem þau reyni að halda vinnu í lágmarki og sinna öðrum hugðarefnum.

Kerfið er nefnilega þannig að þú átt að vinna allt þitt líf og fara svo að leika þér þegar þú kemst á lífeyrisaldurinn. 

„Maður heyrir þetta náttúrulega oft hjá fólki: „Þegar ég hætti að vinna þá ætla ég að gera þetta og þetta.“ Því miður er það þannig hjá mörgum að þegar að því kemur þá er staðan breytt, heilsan er kannski farin, annað kemur upp á og þá er kannski of seint að láta drauma sína rætast,“ segir Snæfríður.

Hún hvetur fólk til að reyna að sleppa því að bíða með að gera það sem þeim þykir skemmtilegt fram á efri árin.

„Það er mikilvægt að láta drauma sína rætast, hvort sem það eru ferðadraumar eða einhverjir aðrir.“

Leitin að peningunum er framleitt í samstarfi við Umboðsmann skuldara með stuðningi frá félagsmálaráðuneytinu.

Fréttin hefur verið uppfærð.