Menningarnótt aflýst

Þetta kemur fram í tilkynningu frá borginni. Þar segir að neyðarstjórn Reykjavíkurborgar hafi á fundi sínum í morgun tekið ákvörðun um þetta og að einhugur hafi verið um ákvörðunina, vegna útbreiðslu kórónuveirunnar í samfélaginu og þeirrar óvissu sem ríkir um áhrif Delta-afbrigðisins á börn, unglinga og aðra viðkvæma hópa.

„Við tókum þessa ákvörðun með hagsmuni allra borgarbúa að leiðarljósi. Það er mjög leitt að þurfa að aflýsa þessum frábæra degi aftur. En við þurfum að gera allt sem í okkar valdi stendur til að stuðla að sem eðlilegustu lífi í borginni og órofinni þjónustu. Þar stendur efst að skólastarf fari fram með eins eðlilegum hætti og hægt er og að raska sem minnst þjónustu okkar við viðkvæma hópa, svo sem aldraða og fatlaða,“ er haft eftir Þórdísi Lóu Þórhallsdóttur, formanni borgarráðs og staðgengli borgarstjóra um ákvörðunina.

Menningarnótt fór síðast fram árið 2019, þar sem henni var aflýst á síðasta ári. Það var sömuleiðis gert vegna faraldursins.