Draymond og Durant kenna stjórninni um hvernig fór fyrir gullaldarliði Warriors

Kevin Durant og Draymond Green unnu NBA-meistaratitilinn árin 2017 og 2018 sem liðsfélagar hjá Golden State Warriors. Liðið hefði getað unnið þrjú ár í röð en beið lægri hlut fyrir Toronto Raptors í úrslitum sumarið 2019 með Durant meiddan á hliðarlínunni.

Sama sumar samdi Durant við Brooklyn Nets og voru þau vistaskipti meðal hluta sem Ólympíumeistararnir ræddu í viðtalsþættinum Chips á vegum Bleacher Report. Þar kemur fram að þeir kenni stjórn Warriors um hvernig fór í kjölfar rifrildris þeirra tveggja sem er talið hafa leitt til þess að Durant ákvað að yfirgefa félagið.

Í leik gegn Los Angeles Clippers í nóvember árið 2018 lenti þeim tveimur saman. Durant hellti sér þá yfir Green þar sem sá síðarnefndi náði ekki skoti og leikurinn fór í framlengingu. Green svaraði fyrir sig og voru hlutirnir fljótir að fara úr böndunum. 

„Fyrir mína eigin geðheilsu, þar sem það hefur verið ítrekað valtað yfir mig allt síðan þú fórst, hversu mikil áhrif hafði rifrildið okkar gegn Clippers á að þú ákvaðst að fara frá Warriors,“ spyr Draymond.

„Það var ekki rifrildið sjálft heldur hvernig allir, þar á meðal Steve Kerr (þjálfari), létu eins og ekkert hefði gerst. Bob Myers (framkvæmdastjóri) reyndi að refsa þér eins og það myndi fela allt sem hafði gerst,“ sagði Durant. 

Hann bætti svo við að þeir tveir hefðu í raun aldrei náð að leysa vandamálið, aðeins forðast það, sökum þess hvernig félagið höndlaði málið.

„Þetta var í fyrsta sinn sem við sem lið fórum í gegnum eitthvað svona. Við hefðum þurft að setja öll spilin á borðið. Ég man eftir að horfa á The Last Dance og þegar Scottie (Pippen) neitaði að fara inn á völlinn undir lok leiks þá stóðu menn upp í klefa eftir leik og sögðu honum hvað þeim fannst. Við hefðum þurft á því að halda.“

„Við reyndum að dansa í kringum vandamálið. Ég var ekki hrifinn af því, andrúmsloftið eftir á gerði allt skrítið. Samskipti eru mikilvæg og við forðuðumst að tala um vandamálið, það fór mest í taugarnar á mér.“

Stjórn Golden State Warriors setti Green í eins leiks bann eftir rifrildið gegn Clippers. Hann tók undir með Durant og sagði að ef málið hefði verið höndlað öðruvísi af stjórn félagsins þá hefði það ekki orðið jafn alvarlegt og raun bar vitni. 

Eins og áður sagði fóru þeir félagar um víðan völl. Meðal annars ræddu þeir þegar það komst upp að Durant væri með nafnlausan Twitter-aðgang, af hverju fólki sé svona illa við ákveðna leikmenn, hvort Durant vilji börn og hvað hann ætli að gera þegar skórnir fara upp í hillu.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.