Flugferð með RAX: Upplifði algjört skilningsleysi þegar eldgosið hófst

„Á bakvið hverja mynd er saga eða sögur,“ segir RAX, en hann er enn alltaf í leit að sinni bestu mynd og segir að hann hafi ekki enn tekið hana. „Þetta er leit alla ævi.“

Ljósmyndir RAX hafa vakið verðskuldaða athygli um allan heim og hefur hann gefið út bækur sínar víða. Hann telur það vera sína skyldu sem ljósmyndara að fanga það sem er að gerast, það sé hluti af mannkynssögunni. Hann bauð Íslandi í dag um borð í flugvélina sína í útsýnisflug og fékk Garpur I. Elísabetarson að sjá hversu mikil vinna liggur að baki hverri mynd.

RAX er ljósmyndari Vísis og hefur einnig unnið að Vísis örþáttunum RAX Augnablik sem urðu svo að Stöð 2 þáttunum Augnablik í lífi sem nú eru í sýningu. 

„Það stingur svolítið,“ viðurkennir RAX í viðtalinu um áhyggjurnar sem hann hefur valdið fjölskyldunni í gegnum árin,  enda er lífsstíllinn vissulega oft óhefðbundinn og oft þarf hann að henda öllu frá sér fyrir verkefni en hann er líka eiginmaður, faðir og afi. 

Flýgur flugvélum frekar en drónum

Umræðan barst að drónamyndatökum, sem RAX notar ekki þar sem hann flýgur oftast flugvél á þá staði sem hann ætlar að mynda.

„Þegar maður var að fljúga þá var ákveðin sérstaða í því. Nú eru komnir drónar og það er kannski auðveldara í sumum tilvikum að taka á dróna. Drónarnir hafa sýnt Ísland allt öðruvísi en aðrir gátu gert. Þú getur ekki gert það enn á flugvél það sem dróni getur gert. Það er náttúrulega frábært og búið að selja þetta land úti um allan heim sem paradís fyrir ljósmyndara og kvikmyndatökumenn og aðra,“ segir RAX.

„Ég hef aldrei átt dróna nema í fimm mínútur, þá flaug ég á tré, segir ljósmyndarinn og ætlar hann að halda sig áfram við að fljúga flugvélum.  

Erfitt að þurfa leyfi til að mynda fréttaaugnablik

Þegar rætt er um eldgosamyndatökur, segir RAX að hér á landi þurfi margt að breytast. Hann upplifði það sterkt þegar eldgosið hófst í Geldingardölum. 

„Það sem mér fannst verst við það, eftir að vera búinn að fara í öll gos á Íslandi og eins með Haraldi vini mínum og eldfjallafræðing í Krakatá, að geta ekki einbeitt sér að því að taka mynd af þessu.“

RAX segir að það sé erfitt að standa í því á þessum augnablikum í Íslandssögunni að vera að semja við aðila um að fá að mynda gosið.

„Það fór í taugarnar á mér. Þetta á bara að vera partur af Almannavörnum, að ljósmyndarar, kvikmyndatökumenn og fréttamenn komi og sýni fólki á Íslandi hvað er að gerast, ekki einhvern á blaðamannafundi að tala. Það bara snýst ekki um það.“

Eins og að tala við hauslausar hænur

Ljósmyndarinn hefur unnið við fréttaljósmyndun í áratugi og segir að það skorti skilning á mikilvægi þess að skrásetja atburði sem þessa alveg frá fyrstu mínútu.

„Það er algjört skilningsleysi á mikilvægi fjölmiðla sem dæmi og líka ljósmyndara og kvikmyndagerðarmanna.“

RAX bendir á að þetta sé hluti af mannkynssögunni.

„Þetta er alls staðar gert í heiminum þegar svona gerist,“ og bætir við:

„Ég skil ekki af hverju þetta getur ekki breyst, við erum búin að reyna í fjörutíu og eitthvað ár. Þetta er stundum eins og að tala við hauslausar hænur.“