Las á netinu að við þyrftum sex stig svo það er „engin pressa“

Ísland vann Rúmeníu 2-1 í október á síðasta ári, í umspili um sæti á EM, með mörkum frá Gylfa Þór Sigurðssyni.

Nú mætast liðin í undankeppni HM í Katar. Eftir leikinn við Rúmeníu leikur Ísland við Norður-Makedóníu á sunnudag og svo stórlið Þýskalands 8. september.

Ísland fékk þrjú stig úr fyrstu þremur leikjum sínum í keppninni, sem allir voru á útivelli í mars. Liðið tapaði í Þýskalandi og Armeníu en vann Liechtenstein. Hvað vill Arnar fá út úr leikjunum þremur sem nú eru fram undan?

„Ég er búinn að lesa einhvers staðar á netinu undanfarna daga að við þurfum að fá alla vega sex stig. Þannig að það er bara „engin pressa“,“ sagði Arnar kíminn.

„Við þurfum að taka leik fyrir leik og sá fyrsti er gegn Rúmeníu sem er mikilvægur heimaleikur sem við myndum gjarnan vilja vinna. Við vitum að það er mjög erfiður leikur,“ sagði Arnar.

„Rúmenía er mikil knattspyrnuþjóð og hefur verið í ákveðinni uppbyggingu með sitt lið. Þegar við unnum þá hérna síðast voru margir ungir leikmenn í hópnum þeirra og þeir eru í því ferli að þróa sitt lið, alveg eins og við erum að þróa okkar lið og hugmyndafræði. Það verður erfitt verkefni að klára Rúmeníu fyrst. Þegar það er komið förum við að hugsa um næstu leiki,“ bætti hann við.

Rúmenía vann Norður-Makedóníu 3-2 í fyrsta leik sínum í undankeppninni en tapaði svo 1-0 á heimavelli gegn Þýskalandi og 3-2 gegn Armeníu á útivelli.