Neville heldur að Solskjær verði ekki rekinn

Liverpool hreinlega niðurlægði United á Old Trafford í gær og vann 0-5 sigur. United hefur aðeins fengið fjórtán stig í fyrstu níu leikjum sínum í ensku úrvalsdeildinni og er í 7. sæti hennar.

Neville segist skilja kröfuna ákallið um að Solskjær verði látinn taka pokann sinn en telur að hann verði áfram í starfi.

„Þetta er hræðilegur dagur fyrir Manchester United. Þetta setur mikla pressu á stjórnina. Stuðningsmennirnir hafa ekki snúist gegn stjóranum inni á vellinum, þeir gera það aldrei. En þeir vita að þetta er ekki boðlegt. Eitthvað verður að breytast í búningsklefanum og með þennan þjálfara og sem fyrst,“ sagði Neville á Sky Sports eftir leikinn í gær.

„Það var átakanlegt að horfa á viðtalið við Solskjær. En þetta er hluti af leiknum. Þetta er Manchester United. Ef þetta hefði gerst strax eftir Sir Alex Ferguson tímann hefði Solskjær verið undir svakalega mikilli pressu. En ég held að félagið fari ekki á taugum. Þeir hafa ekki undirbúið að fá annan stjóra á þessu tímabili. Ég held að þeir haldi honum til loka tímabilsins.“

Neville segir forráðamenn United séu brenndir eftir tíma Louis van Gaal og José Mourinho hjá félaginu.

„Það verður kröftugt ákall frá stuðningsmönnum og fjölmiðlum um að Ole verði rekinn og ég skil það eftir þennan leik. Þetta var hræðilegur dagur og það tekur tíma að jafna sig eftir hann. En hvað eigendurna varðar held ég að ástandið sé stöðugra. Ef þeir ætla að styðja við bakið á stjóranum, sem ég held að þeir geri, ættu þeir að koma þeim skilaboðum til stuðningsmannanna,“ sagði Neville.

„Ástæðan fyrir því að stjórnin er stöðug er vegna þess sem gerðist með Van Gaal og Mourinho. Þeir ráða ekki mann til að koma inn fyrir tvö tímabil eða svo.“

Næsti leikur United er gegn Tottenham á útivelli á laugardaginn.