Meira en þúsund dagar síðan heimalið fagnaði sigri í leikjum KR og Njarðvíkur

KR tekur þá á móti Njarðvík í fjórðu umferð Subway-deildar karla og nú er spurning hvort liðin brjóti þessa hefð síðustu ára.

Það eru nefnilega liðnir 1085 dagar síðan að heimaliðið fagnaði sigri í innbyrðis leik KR og Njarðvík í úrvalsdeild karla.

Síðasti heimasigurinn í leikjum þessara liða var 9. nóvember 2018 þegar Njarðvíkingar unnu glæsilegan sigur í Ljónagryfjunni.

Njarðvíkingar unnu leikinn 85-67 í Njarðvík þar sem Mario Matasovic skoraði 24 stig og Maciek Stanislav Baginski var með 17 stig. Julian Boyd skoraði 25 stig fyrir KR í þeim leik en Jón Arnór Stefánsson var stigahæstur íslensku leikmannanna með 10 stig. Björn Kristjánsson er eini leikmaður KR sem var í þeim leik og er enn að spila.

Útiliðið hefur unnið fimm síðustu leikina þegar liðin hafa mæst þar af hafa Njarðvíkingar unnið þrjá síðustu leiki sína í Vesturbænum.

KR tókst síðast að vinna Njarðvík á heimavelli í úrslitakeppninni vorið 2018 en síðasti heimasigur Vesturbæinga á móti Njarðvík í deildinni var 22. mars 2018.

Leikur KR og Njarðvíkur hefst klukkan 20.15 í kvöld og er sýndur beint á Stöð 2 Sport. Strax á eftir mun Subway-Körfuboltakvöld gera upp alla fjórðu umferðina á sömu stöð.