Innlent

Vegagerð um Teigsskóg boðin út á næstu vikum

Kristján Már Unnarsson skrifar
Sigurþór Guðmundsson er verkefnastjóri Vegagerðarinnar á Dynjandisheiði og í Gufudalssveit.
Sigurþór Guðmundsson er verkefnastjóri Vegagerðarinnar á Dynjandisheiði og í Gufudalssveit. Egill Aðalsteinsson

Eftir tveggja áratuga deilur um Teigsskóg er komið að því að bjóða út vegagerð í gegnum skóginn umdeilda og er stefnt er að því að vinnuvélar verði komnar á svæðið síðla vetrar.

Í fréttum Stöðvar 2 voru sýndar myndir frá þverun Þorskafjarðar, sem er einn þriggja verkhluta sem komnir eru í gang í endurnýjun Vestfjarðavegar um Gufudalssveit. Fyrst var kafli í Gufudal kláraður en auk Þorskafjarðarbrúar er búið að bjóða út kafla í Djúpafirði.

Úr Teigsskógi við Þorskafjörð. Þar er nú þegar gamall vegslóði.KMU

Og núna er komið að umdeildasta áfanganum; leiðinni um sjálfan Teigsskóg, sem lýst hefur verið sem sögunni endalausu. Það hyllir undir upphafið að endinum.

„Núna næst stefnum við að því að bjóða út Teigsskóginn sjálfan, frá Þórisstöðum að Hallsteinsnesi. Og helst bara núna - í haust,“ segir Sigurþór Guðmundsson, verkefnisstjóri Vegagerðarinnar í Gufudalssveit og á Dynjandisheiði.

Útboðið segir Sigurþór að verði auglýst annaðhvort í þessum mánuði eða þeim næsta.

„Þetta tekur tvo mánuði að fara í gegnum svona útboð og samninga. Og svo þarf náttúrlega verktakinn að koma sér fyrir.“

Göngufólk á leið milli Grafar og Hallsteinsness. Þarna mun vegurinn liggja uppi í hlíðinni vinstra megin.KMU

-Hvenær megum við búast við því að vinnuvélarnar verði komnar í Teigsskóg?

„Ég er nú frekar óþolinmóður í þessu þannig að ég er nú að vonast til þess að það yrði þá bara.. í mars,“ svarar Sigurþór.

Gufudalsveitin ásamt Dynjandisheiði eru tveir síðustu malarkaflarnir á vesturleiðinni til Ísafjarðar, samtals 57 kílómetra langir. Í síðustu viku kom fram að Vegagerðarmenn undirbúa núna næsta útboðsáfanga á Dynjandisheiði. Þeir segjast markvisst stefna að því að innan þriggja ára verði Vestfjarðahringurinn allur kominn með bundið slitlag.

„Við erum sem sagt að horfa til þess að vera búnir 2024,“ segir verkefnisstjóri Vegagerðarinnar.

Hér má sjá frétt Stöðvar 2:

Teigsskógur Reykhólahreppur Vegagerð Samgöngur Umferðaröryggi Umhverfismál Fuglar

Tengdar fréttir

Sögunni endalausu um Teigsskóg virðist lokið með sögulegum samningi

Það vakti athygli margra síðdegis í gær að á meðan löngum ríkisstjórnarfundi um minnisblað sóttvarnalæknis stóð greindi samgönguráðherra frá langþráðum áfanga í vegagerð hér á landi. Vegalagning um Gufudalssveit væri fram undan en deilur um svæðið og nýjan veg þar um hafa staðið í tvo áratugi. Sagan endalausa virðist ætla að enda eftir allt saman.

Keppast við vegabætur áður en holskefla ferðamanna ríður yfir

Vestfirðingar gleðjast yfir því í dag að ferðabókaútgefandinn Lonely Planet hafi sett fjórðunginn í efsta sæti yfir þau svæði heims sem best sé að heimsækja á næsta ári. Ferðamanna bíða hins vegar holóttir malarvegir og einbreiðar brýr fyrir vestan og það stefnir í bið eftir næsta áfanga á Dynjandisheiði.

Mest lesið


Fleiri fréttir

Sjá meira


×

Mest lesið