Fá ekki að spila heimaleiki í varabúningum fyrir góðgerðarmál

Enska úrvalsdeildin hefur hafnað beiðni þeirra níu liða sem spila heimaleiki á öðrum degi jóla um að fá að spila leikina í varabúningum sínum. Ónotaðar aðaltreyjur liðanna áttu þá að vera seldar á uppboði með eiginhandaráritunum leikmanna.

Þeir fjármunir sem myndu safnast af þessari treyjusölu áttu svo að renna til góðgerðafélagsins Shelter sem berst gegn heimilisleysi í Bretlandi.

Talsmaður ensku úrvalsdeildarinnar segir að deildinni berist mikið af beiðnum af þessu tagi, en geti því miður ekki styrkt þau öll.

„Ensku úrvalsdeildinni berast margar beiðnir frá góðgerðasamtökum á hverju tímabili, en við getum ekki styrkt þau öll. Félögin hafa fullan rétt á að styrkja góð málefni, svo lengi sem það fylgi reglum ensku úrvalsdeildarinnar.“

Þau lið sem leika heimaleiki á öðrum degi jóla eru Liverpool, Wolves, Burnley, Manchester City, Norwich, Tottenham, West Ham, Aston Villa og Brighton, en samkvæmt heimildum Sky Sports hafa forráðamenn EFL, sem samanstendur af fyrstu, annarri og þriðju deild Englands, ekkert á móti því að lið í þeim deildum taki þátt í verkefninu.