Von á miklum fjölda við útför Fjölnis

Útförin verður að hætti ásatrúarmanna. Til stóð að Hilmar Örn Hilmarsson allsherjargoði myndi annast athöfnina. En hann er kominn í sóttkví og Jóhanna G. Harðardóttir Kjalnesingagoði mun annast útförina.

Fjölnir Geir var afar vinamargur og er búist við miklu fjölmenni. Gestir, þeir sem ætla að vera viðstaddir, þurfa að framvísa neikvæðu hraðprófi sem ekki má vera eldra en 48 klukkustunda gamalt við komu. Hvatt er til þess, vegna faraldursins, að fólk fylgist með útförinni í gegnum streymi.

Útfarir hafa verið í mikilli óvissu undanfarin tvö ár

Rúnar Geirmundsson hjá Útfararþjónustunni er útfararstjóri og hann segir að svo virðist sem fjölmargir ætli að mæta og standa úti en það lítur út fyrir að veður verði ágætt.

„Ég heyri það, já. Til að fylla ekki kirkjuna. Svo eru þarna margir sem fara í kirkju. Ég er búinn að ákveða að hafa kirkjuna opna út,“ segir Rúnar í samtali við Vísi. Hann segir að þeir sem úti standa geti svo fylgst með útförinni á símum sínum, í gegnum streymið.

Rúnar segir að mikið óvissuástand sé og hafi verið nú í tæp tvö ár. „Ég óttast það mest, hvað Þórólfur gerir núna. Það mættu vera 500 ef allir eru testaðir en það gæti hæglega farið niður í 50 manna fjöldatakmarkanir.“

Rúnar segir að undanfarin tæp ár hafi reynst afar erfið og það hafi oft á síðustu stundu þurft að breyta athöfnum. Þetta sé mjög skrítinn tími. „Söngvarar detta út á síðustu stundu og aðrir inn. Sálmaskrár sem búið er að prenta hafa riðlast. Eitt sinn var búið að skipuleggja 500 manna jarðarför og veislu sem þurfti að hætta við. Kórarnir eru dottnir út, í mesta lagi kvartett,“ segir Rúnar. Þetta hefur verið afar erfitt fyrir aðstandendur.

„Þetta eru endalausar áskoranir. En okkur hefur hinga til tekst að finna einhverja leið og klára þessar jarðarfarir þannig að sómi sé að. Látum þetta fara eins vel og leysum þetta, förum eftir þeim reglum sem okkur eru settar þó þær geti reynst íþyngjandi,“ segir Rúnar. 

Jón Gnarr, Krummi og fleiri mæta

Athygli vekur að útförin fer fram í kirkju en hún er að hætti ásatrúarmanna. Rúnar segir að þær fari gjarnan fram í Fossvogskirkju sem ekki er í eigu þjóðkirkjunnar, sem hefur tekið fyrir að athafnir sem tengjast öðrum trúarsöfnuðum fari fram í sínum kirkjum. En Siðmennt og Ásatrúarmenn noti Fossvogskirkju. Þar til þeir hafa reist hof sitt sem nú er verið að reisa í Öskjuhlíð.

Til stendur að Jón Gnarr komi og tali við útförina, tónlistamaðurinn Krummi mæti og einhverjir fleiri, til að kveðja Fjölni Geir hinstu kveðju.