836 greindust smitaðir innan­lands í gær

482 af þeim 836 sem greindust innanlands í gær voru utan sóttkvíar við greiningu, eða 58 prósent. 354 voru í sóttkví, eða 42 prósent.

Þetta kemur fram á síðunni covid.is. 4.995 eru nú í einangrun vegna Covid-19 samanborið við 4,174 í gær. 7.060 eru nú í sóttkví, en voru 6.187 í gær. 494 eru nú í skimunarsóttkví.

21 sjúklingur liggur nú inni á sjúkrahúsi vegna Covid-19, en voru fjórtán í gær. Á vef Landspítala segir að meðalaldur inniliggjandi séu 63 ár. Fjórir eru á gjörgæslu og þrír þeirra eru í öndunarvél. 5.126 sjúklingar eru nú í eftirliti á Covid-göngudeild Landspítalans, þar af 1.142 börn.

57 greindust á landamærunum í gær – 41 virkt smit í fyrri landamæraskimun og er niðurstöðu mótefnamælingar beðið í tilviki sextán.

Nýgengi á smiti innanlands, þ.e. fjöldi smitaðra á hverja 100 þúsund íbúa undanfarnar tvær vikur, er nú 1.359,1 en var 1171,0 í gær. Nýgengi á smiti á landamærum er nú 94,1 samanborið við 86,2, í gær.æ

Alls hafa 24.340 manns greinst með kórónuveiruna hér á landi frá því faraldurinn hófst í lok febrúar á síðasta ári. Þá hafa 37 andlát verið rakin til COVID-19 hér á landi frá upphafi faraldursins.

Alls voru tekin 3.522 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá var 1.066 sýni tekin á landamærunum eða í seinni landamæraskimun og 1.107 í svokallaðri sóttkvíar- og handahófsskimun.