All­hvöss norðan­átt og snjó­koma eða él víða á landinu

Á vef Veðurstofunnar segir að ferðalangar séu hvattir til að athuga aðstæður á vegum áður en lagt sé af stað, sérstaklega ef förinni er heitið yfir fjallvegi.

„Síðdegis má búast við lítilsháttar éljum á Norður- og Austurlandi, en þá ætti að stytta upp og létta til vestanlands og einnig sunnanlands. Frost 0 til 4 stig í dag, en kólnar í kvöld.

Á morgun er spáð minni vindi en í dag, útlit er fyrir norðaustan kalda eða strekking. Bætir í ofankomu um tíma norðan- og austanlands, en sunnan heiða er léttskýjaður dagur í vændum. Frost 1 til 7 stig.“

Veðurhorfur á landinu næstu daga

Á fimmtudag: Norðaustan 8-15 m/s og snjókoma eða él norðan- og austanlands, en léttskýjað sunnan heiða. Frost 0 til 6 stig.

Á föstudag (gamlársdagur): Austan 3-10, en 10-15 syðst á landinu. Víða þurrt og bjart veður, en stöku él með austur- og suðurströndinni. Hiti frá frostmarki syðst, niður í 12 stiga frost í innsveitum fyrir norðan.

Á laugardag (nýársdagur): Gengur í norðaustan storm með snjókomu eða slyddu, en síðar rigningu syðst á landinu. Hlýnandi veður í bili.

Á sunnudag: Hvöss norðanátt með snjókomu eða éljum, en þurrt að kalla suðvestantil á landinu. Frost 3 til 8 stig.

Á mánudag: Minnkandi norðanátt. Dregur úr ofankomu á Norður- og Austurlandi, en léttskýjað sunnan- og vestanlands. Áfram kalt í veðri.

Á þriðjudag: Vaxandi suðaustanátt og þykknar upp með úrkomu um landið sunnan- og vestanvert. Þurrt og kalt veður á Norður- og Austurlandi.