Norð­læg átt, strekkingur og él austan­lands en annars hægara

Á vef Veðurstofunnar segir að það verði austlægari vindar og bjartviðri síðdegis, kaldi suðvestan til, en annars hægari.

„Á morgun gengur dálítið lægðardrag norðaustur yfir landið og því fylgir allhvöss eða hvöss suðaustanátt með úrkomu í formi rigningar eða slyddu sunnan og vestan til. Jafnframt nálgast dýpkandi lægð hröðum skrefum sunnan úr hafi og um kvöldið gengur í suðaustanstorm eða -rok með talsverðri rigningu á sunnanverðu landinu. Aðfaranótt fimmtudags gengur illviðrið norðaustur yfir landið, en fer síðan að ganga niður er líður á daginn.

Hvassviðri og úrkoma á morgun og fimmtudag getur valdið vandræðum í umferð á vegum og víðar og því ekki ólíklegt að sendar verði út veðurviðvaranir. Þeir sem erui á ferðinni þá eru hvattir til að kynna sér vel ástand vega og veðurspár áður en lagt er af stað,“ segir færslunni.

Veðurhorfur á landinu næstu daga

Á miðvikudag: Suðaustan 10-18 m/s og rigning eða snjókoma með köflum, hiti kringum frostmark. Hægari vindur á NA-verðu landinu og lengst af þurrt og svalt í veðri. Gengur í suðaustanhvassviðri eða -storm um kvöldið með talsverðri rigningu syðra og hlýnandi veðri.

Á fimmtudag: Sunnan og suðaustan 18-25 m/s og rigning eða slydda með köflum, en talsverð úrkoma SA-lands. Hiti 1 til 6 stig. Dregur úr vindi seinnipartinn, kólnar og styttir upp N-lands.

Á föstudag: Sunnan og suðvestan 8-15 m/s og rigning eða slydda með köflum á S- og V-landi með hita 1 til 5 stig. Þurrt um landið NA-vert og hiti við frostmark. Vaxandi suðaustanátt um kvöldið með aukinni rigningu S-til.

Á laugardag: Snýst í hæga suðlæga átt með lítilsháttar rigningu eða snjókomu, en austanstrekkingur með N- og A-ströndinni fram eftir degi. Hiti kringum frostmark.

Á sunnudag: Útlit fyrir vaxandi suðaustan og síðan suðvestlæga átt með rigningu eða slyddu víða um land.

Á mánudag: Líklega fremur hæg suðlæg átt með skúrum eða éljum og svölu veðri.