Einkunnir eftir sigurinn frækna á Frökkum: Frammistaða sem sagði sex og margir léku sinn besta landsleik

Eflaust voru margir sem óttuðust hið versta þegar Janus Daði Smárason og Arnar Freyr Arnarsson greindust með kórónuveiruna í dag. Þeir bættust þar með í hóp með Aroni Pálmarssyni, Björgvini Páli Gústavssyni, Bjarka Má Elíssyni, Elvari Erni Jónssyni, Ólafi Guðmundssyni og Gísla Þorgeiri Kristjánssyni sem höfðu áður greinst með veiruna.

Þrátt fyrir þessi forföll beit ekkert á íslenska liðið sem vann frækinn sigur á Frökkum í kvöld. Frakkland hafði unnið alla fjóra leiki sína á EM til þessa en strandaði á einbeittu, baráttuglöðu og hugrökku íslensku liði.

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.

Eins og búast mátti við skora margir leikmenn íslenska liðsins hátt fyrir frammistöðu sína gegn Ólympíumeisturunum. Alls fengu fimm leikmenn hæstu einkunn (6) auk þjálfarans, Guðmundar Guðmundssonar. Margir leikmenn íslenska liðsins þóttu leika sinn besta landsleik á ferlinum í kvöld.

Allir sem komu við sögu í leiknum skiluðu sínu og hvergi var veikan blett að finna á íslenska liðinu sem er komið með fjögur stig í milliriðli I.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Frakklandi:

- Byrjunarlið Íslands í leiknum -

Viktor Gísli Hallgrímsson, mark - 6 (18/1 varin skot- 57:00 mín.) Þvílík frammistaða. Eftir að hafa átt erfitt uppdráttar á mótinu kom 21 árs markvörður og sýndi og sannaði hvers vegna hann er talinn einn sá efnilegasti í heimi. Að gera það sem hann gerði á þessu sviði, gegn Ólympíumeisturum Frakka, er ekki einfalt mál. Stórkostlegur leikur og veit vonandi á gott fyrir framhaldið.

Orri Freyr Þorkelsson, vinstra horn - 3 (0 mörk - 41:14 mín.) Lék sinn annan leik á stóra sviðinu. Náði ekki að skora en sinnti varnarskyldunum af stakri snilld og var partur af frábærri liðsheild.

Elvar Ásgeirsson, vinstri skytta - 4 (2 mörk - 39:28 mín.) Var ískaldur í sínum öðrum landsleik. Skoraði tvö frábær mörk og varnarlega mjög öflugur allan leikinn, frá upphafi til enda. Góð viðbót við breiðan hóp Íslands.

Viggó Kristjánsson, leikstjórnandi - 6 (9/1 mörk - 35:31 mín.) Lék sinn langbesta landsleik frá upphafi. Margir hafa efast um Viggó en þvílíkur karakter og kjarkur. Sýndi og sannaði að hann er einn albesti leikmaður íslenska landsliðsins. Tók leikinn á sínar herðar þegar Ómar Ingi var klipptur út í seinni hálfleik og sýndi hreint ótrúlega leiðtogahæfileika í íslensku sókninni.

Ómar Ingi Magnússon, hægri skytta - 6 (10/3 mörk - 47:14 mín.) Sýndi og sannaði að þar fer einn albesti handboltamaður heimsins. Leikskilningur og yfirsýn er með því besta sem sést hefur. Leikmaður sem er á allra vörum og hafi einhver efast um að hann beri nafnbótina Íþróttamaður ársins með rentu geta menn gleymt því. Ómar Ingi er rétt að hefja sinn feril. Frammistaða hans í fyrri hálfleik fer í sögubækurnar.

Sigvaldi Guðjónsson, hægra horn - 4 (2 mörk - 59:12 mín.) Steig upp eftir dapra frammistöðu í síðasta leik. Fékk kannski ekki þá þjónustu sem hann þarf á að halda en hann er mættur aftur og það er fagnðarefni.

Elliði Snær Viðarsson, lína - 6 (4 mörk - 55:08 mín.) Lék sinn langbesta landsleik. Baráttan, krafturinn og viljinn smitaði út frá sér til annarra leikmanna. Algjörlega óttalaus. Stundum full kærulaus í skotum en erfitt að gagnrýna svona keppnismann eftir þessa frammistöðu.

Ýmir Örn Gíslason, vörn - 6 (4 stopp - 32:42 mín.) Langbesti leikur Ýmis á mótinu. Einhver kallaði hann bastarð; nei drullusokkur er hann með jákvæðum formerkjum. Þvílíkt barátta hjá fyrirliðanum sem dró liðið með sér frá fyrstu mínútu og lék að öllum líkindum sinn langbesta landsleik þrátt fyrir að hafa ekki náð að skora.

- Menn sem komu inn af bekknum í leiknum -

Daníel Þór Ingason vinstri skytta/vörn - 5 (1 mark - 30:01 mín.) Tapar ekki stöðunni maður gegn manni. Nautsterkur, eðaleintak og hugar fyrst og síðast um liðsheildina. Hefur átt afar mikilvæga innkomu á mótinu og verðskuldar sæti í íslenska liðinu. 

Vignir Stefánsson vinstra horn - 3 (0 mörk - 18:46 mín.) Lék sinn fyrsta leik á stóra sviðinu. Náði ekki að skora en eins og hjá öðrum í íslenska liðinu var varnarleikur hans til fyrirmyndar.

Teitur Örn Einarsson hægri skytta - 3 (1 mark - 1:53 mín.) Skilaði frábæru marki. Verið stórkostlegur með Flensburg í Þýskalandi en ljóst að hann keppir við tvo frábæra leikmenn um stöðu í íslenska liðinu. Hans tími mun koma.

Ágúst Elí Björgvinsson, mark - spilaði of lítið 

Kristján Örn Kristjánsson, hægri skytta - spilaði ekkert 

Magnús Óli Magnússon, vinstri skytta - spilaði ekkert

Guðmundur Guðmundsson, þjálfari - 6 Sóknarleikur Íslands hefur verið stórkostlegur allt mótið. Leikáætlun hjá þjálfaranum hefur nánast verið upp á tíu, frá upphafi til enda. Sigurinn er án nokkurs vafa einn sá stærsti sem Guðmundur hefur unnið með íslenska landsliðið og þá er meðtalinn gegn leikurinn gegn Spánverjum á Ólympíuleikunum í Peking. Keppnismaðurinn Guðmundur mun örugglega ekki láta staðar numið. Það glittir í undanúrslit eins og í Svíþjóð 2002.